Në stadim të pranishëm ishin rreth 13 mijë tifozë. Për t’u veçuar se këtë herë flakadanët dhe mjetet piroteknike ishin me pakicë në stadium. Meritë kjo e policisë dhe e stjuartëve që këtë herë kishte marrë masa të jashtëzakonshme.

-Ndeshjen e kanë ndjekur shumë figura të sportit dhe lojtarë të dyja skuadrave që tani janë në ekipe të ndryshme.

-Maget në fund të ndeshjes, ulet dhe falet, duke shkarkuar të gjitha emocionet. Ishte ai që gaboi te goli i Tiranës.

-Të parët që dolën në nxehje ishin portierët e Partizanit dhe më pas ata të Tiranës. Të kuqtë kishin zgjedhur “Tunderstrack” të AC/DC-ve si këngën e derbit.

-Në një moment të lojës, Skuka gabon, duke humbur një top, më pas mundohet që të rikuperojë sferën dhe pasi e bën kërkon falje.

-Në fillim të takimit, momente të sikletshme për Alban Hoxhën. Portieri mezi heq bluzën e bardhë që kishin veshur të gjithë lojtarët.

-Në pjesën e parë mosmarrëveshje mes kryesorit dhe anësorit për një rivënie anësore. Gjyqtari i linjës e jep për Partizanin, kryesori për Tiranën. Batuta e anësorit ishte për kornizë. “Ja q… n….”, i tha ai kryesorit, batutë që është dëgjuar edhe nga tifozët.

-Pas pësimit të golit, Shehi thërret Sotën, Muratajn dhe Hadrojn e u tregon me skemë sesi duhet të luajnë.

-Në një nga zëvendësimet e Tiranës, gjyqtari i katërt ngre tabelën, por në vend të dalin numrat normalë dalin dy zero. Hare në stadium.

-Në fillim të ndeshjes dy tifozëritë luftuan me koreografitë e tyre. Grupimi “Guerrils” hapi banderolën me vitin e krijimit të Partizanit, me numrat romak, teksa shkruhej në gjuhën latine shprehja: “Ai që vuan, fiton”. Nga ana tjetër, “Tirona Fanatics” hapën një banderolë me hartën e kryeqytetit të ngjyrosur me blu. Dhe periferinë që konsiderohet pjesë e Partizanit.

-Xhuliano Skuka e ka përjetuar derbin e djeshëm mes Partizanit dhe Tiranës si një “ultras” i vërtetë i të kuqve. Sulmuesi la shenjë në këtë sfidë, duke shënuar golin e barazimit të përkohshëm në fitoren 2-1 të skuadrës së tij. Puthja e stemës pas golit ishte vetëm sinjali i parë i sulmuesit, i cili sapo u zëvendësua dhe shkoi në pankinë, veshi aty një fanellë me stemën e “Ultras Guerrils”. Dhe në fund të sfidës, sapo u dëgjua vërshëllima përfundimtare e gjyqtarit Olsid Ferataj që dekretoi fitoren e të kuqve, ai nuk shkoi të festonte me shokët e skuadrës por vrapoi drejt tribunës së ultrasve të Partizanit. Sulmuesi u hodh mes tyre për të festuar me ata suksesin në këtë sfidë shumë të rëndësishme për tifozerinë e kuqe.

– Para ndeshjes, gjatë nxehjes, trajneri i Partizanit Orges Shehi bisedonte me Olsi Ramën, drejtorin e të kuqve.

– Rimal Haxhiu është një lojtar “fair play”. Një moment kur Skuka qëndron i shtrirë në fushë pasi mori një goditje në kokë, futbollisti i Tiranës i shkon dhe interesohet.

– Protesta të ashpëra në pjesën e parë nga stafi teknik i Tiranës.

– Deliu bën një ndërhyrje nga mbrapa dhe fiton topin. Ferataj sinjalizon faull, teksa mesfushori reagon me ironi drejt kryesorit që nuk i kursen kartonin e verdhë.

– Skuka zëvendësohet dhe tenton që të dalë nga fusha sa më larg, por Ferataj e urdhëron që të largohet nga fusha në krahun e tij.

– Në fund, pasi mbaron ndeshja, Latifi kapet me Sembene, teksa ndërhyjnë lojtarët e tjerë dhe i ndajnë.

SHKRIMIN E PLOTË MUND TA LEXONI NË VERSIONIN PRINT TË GAZETËS PANORAMA SPORT

OLSI AVDIAJ-PANORAMASPORT.AL

NDIQE LIVE "PANORAMA TV"

---