Në Berat qajnë edhe barazimin, Çaço: Duhet të ishim më vigjilentë
Barazimi me Vorën nuk u ka pëlqyer aspak beratasve. Tomori ishte në avantazh pas golit të Aldrit Oshafit, por në fund i iku fitorja nga duart. Ervis Çaço mendon se skuadra meritonte trepikëshin në atë transfertë, megjithatë duhet të ishin më vigjilentë.
Gjatë një deklarate të dhënë për “Panorama Sport”, kapiteni rrëfen çfarë nuk shkoi në atë takim dhe flet për vazhdimësinë. “Mendoj se e meritonim fitoren. Kemi qenë më lart se kundërshtari ynë dhe është e trishtueshme që na ka ikur fitorja në atë mënyrë në fund të takimit. I kishim mundësitë që të ndëshkonim edhe me një gol të dytë Vorën, por edhe të ruanim më shumë qetësinë dhe kishim përqendrimin në çastin e pësimit të golit.
Tani na duhet të ecim përpara. Nëse do të bënim një krahasim me javën e parë të sezonit, jemi përmirësuar ndjeshëm. Mjafton që Tomori guxon të fitojë edhe në transferta. Ky është një tregues i përmirësimit tonë të madh”, përfundoi Çaço.
EDI SPAHIU-PANORAMASPORT.AL
NDIQE LIVE "PANORAMA TV"