Moshat U-19 | Sherr mes lojtarëve në kryeqytet
KATEGORIA SUPERIORE, GRUPI A
“Poker” i Vllaznisë
Vllaznia nuk di të ndalet, teksa fiton edhe ndaj Akademisë dhe ruan kreun në grupin A. Ekipi shkodran ka kaluar në avantazh me anë të Palushanit në minutën e 8-të, ndërsa më pas i njëjti autor dyfishoi shifrat në pjesën e dytë. Kuqeblutë nuk u kënaqën me dy gola, pasi Hysenaj bëri diferencën, duke shënuar dy të tjerë dhe vulosur fitoren.
Admir Uruçi
Rikthehet Partizani
Partizani ka shpërthyer me fitoren 4-0 ndaj Portos, duke lënë pas atë humbje të thellë ndaj Internacionalit. Ka spikatur qendërmbrojtësi Aiden Çelaj, i cili hapi serinë e golave për të kuqtë, duke zhvilluar një ndeshje mbresëlënëse. Për skuadrën e Shehut realizuan edhe Vatnikaj, prodani dhe Fetaj, duke plotësuar fitoren e thellë.
Abdulla Dushku
Zenuni, hero për Tiranën
Tirana rikthehet në ditët e saj më të mira, duke mposhtur Laçin me shifrat e thella 5-1. Ronaldo Zenuni ishte protagonisti absolut i takimit të djeshëm, duke shënuar plot katër. Ndërsa golin e pestë për bardhebltuë e realizoi Bardhi. Për laçianët kishte shënuar Stojani kur rezultati ishte 1-0, por ky gol vlejti vetëm për statistikë.
Abdulla Dushku
Kukësi akuzon arbitrin
Kukësi ka humbur në minutat e fundit ndaj Internacionalit, në një ndeshje ku stafi verior ka akuzuar arbitrin. “Gjyqtarët nga Shkodra i kanë dhuruar ekipit kundërshtar 3 pikët. Në fund të ndeshjes arbitri ka akorduar dy penallti të paqena”, citohej në faqen zyrtare të klubit të Kukësit. Për miqtë shënuan me penallti Pinari dhe Çema.
Skerdilaid Sulozeqi
KATEGORIA SUPERIORE, GRUPI B
Tushi nderon vlonjatët
Flamurtari ka fituar minimalisht 1-0 ndaj Dinamos. Vlonjatët i janë falur golit të mrekullueshëm të Xhulio Tushit. Loja ka qenë mjaft e luftuar, ku Manellari ka qenë rreziku kryesor gjatë gjithë lojës. Megjithatë, Qirko ka mbajtur portën të paprekur me disa pritje spektakolare. Gjithsesi, fitorja e kuqezinjve ishte e merituar.
Kastriot Brahimaj
Tripletë e Skënderbeut
Skënderbeu nuk ka gabuar në shtëpi, duke mposhtur Lushnjën. Ndeshja e djeshme startoi 15 minuta me vonesë, pasi portieri i parë i Lushnjës, Shkurti, nxori shpatullën në nxemje dhe stafi teknik i Lushnjës u desh të aktivizonte një lojtar në portë për shkak se nuk kishte rezervë. Golat për korçarët u shënuan nga Shaqe, Koutousis dhe Pejo.
Llazi Saro
Teuta bën detyrën
Teuta bën detyrën në shtëpi, duke mposhtur Pogradecin me dy gola që në pjesën e parë. Pistolja dhe Vila mbyllën llogaritë për 21 minuta, ndërsa Pogradeci u dorëzua totalisht. Në pjesën e dytë pati pak histori, me miqtë që u munduan të reagonin, por pa forcën e duhur. Durrsakët e Begejës mbajnë të hapura shpresat për zonën “play-off”.
Jeton Rexhmati
“Luftë” për mbijetesën
Katër kartonë të kuq dhe përplasje mes lojtarëve. AF Dinamo dhe Shkëndija e Durrësit kanë zhvilluar dje një ndeshje shumë të luftuar, teksa blutë fituan 2-1, duke rihapur garën për mbijetesë. Gjyqtari Ujka ka ndëshkuar ashpër ndërhyrjet e rënda mes lojtarëve, por edhe përplasjet fizike. Në fund vulosi një penallti e Veselit.
Abdulla Dushku
KATEGORIA E PARË, GRUPI A
KATEGORIA E PARË, GRUPI B
