Gjoka: Nuk ka titullarë të padiskutueshëm tek Apolonia!
Bardhejeshilët kanë arritur të kalojnë me sukses testin e parë të zhvilluar në kampingun e Pogradecit. Kjo jo se e kanë mundur me rezultatin 1-0 skuadrën vendëse në miqësoren e zhvilluar, por dhe sepse kanë arritur të prodhojnë një lojë të mirë në përgjithësi e të tregojnë se janë drejt harmonizimit përfundimtar, duke pasur një skuadër tashmë të formatuar. Trajneri i Apolonisë, Ernest Gjoka, në një prononcim për “Panorama Sport” u shpreh jo shumë i kënaqur me të besuarit e tij. “S’mund të them se jam plotësisht i kënaqur nga loja e zhvilluar me lojtarët tanë. Vërtet të gjithë ata që u aktivizuan u munduan të kryejnë sa më mirë detyrat e ngarkuara. Lëvizën mirë në fushë duke qenë të shpejtë, të zhdërvjelltë, por dhe të saktë në veprimet e tyre. Prodhuan një lojë të pëlqyeshme dhe e mbajtën kundërshtarin nën presion duke krijuar raste të shumta shënimi, megjithëse arritën të shënonin vetëm një gol”, është shprehur fillimisht Gjoka. Ndërkohë duke folur për fraksionin e dytë të lojës, trajneri shtoi: “Qëllimi ynë në miqësoren me Pogradecin ishte që të shikonim të gjithë lojtarët në gjendje loje. Kjo na bëri që në pjesën e dytë të aktivizonim të gjithë kontingjentin e lojtarëve që kemi në dispozicion. Megjithëse nuk shënuan gola të tjerë, ata zhvilluan një lojë racionale me mendim, duke vazhduar kështu rrjedhën e lojës së titullarëve, të cilët do të përbëjnë edhe formacionin bazë, të paktën sipas mendimit që kemi për momentin. Gjithsesi, dua ta theksoj se në këtë skuadër askush nuk e ka të sigurt vendin e titullarit”. Pyetjes se ku qëndruan mangësitë e ekipit që ai drejton në këtë ndeshje miqësore, tekniku Gjoka iu përgjigj: “Ne nuk mund t’i nxjerrim në pazar të gjitha mangësitë e shtëpisë, por megjithatë po ju them se ne po kërkojmë të kemi një ekip sa më solid që të luajë në kolektivitet të plotë në të gjitha aspektet”.
Mikel Mbriçaj
