Plas te Flamurtari! Klubi vlonjat ka pe zulluar dje kapitenin Franc Veliu, mbrojtësin Polizoi Arbri, si dhe tre të huajt: Vukashin Tomiç, Baco Nikoliç dhe Jani Urdinov. Burime të sigurta pranë drejtuesve konfirmuan për “Panorama Sport” se këtyre katër lojtarëve u është bërë e ditur se për një afat të pacaktuar nuk duhet të stërviten me Flamurtarin, por me skuadrën e të rinjve të klubit. Kjo masë është marrë nga presidenca me motivacionin për performancë të dobët të lojtarëve në ndeshjet e aktivizuara së fundmi, që kanë sjellë edhe mungesën e rezultateve.

Ndërkohë, si për të vërtetuar masën që është marrë, në seancën e së enjtes të katërt futbollistët kanë munguar, por gjithashtu ata nuk kanë qenë të pranishëm as në stërvitje me të rinjtë. Mendohet se ky është vetëm hapi i parë i klubit pas ecurisë negative në kampionat. Masat janë paralajmëruar prej kohës nga drejtuesit dhe duket se tani thjesht po zyrtarizohen.

Reagimet – Veliu dhe Arbri mohojnë për gazetën që të jetë marrë ndaj tyre një masë pezullimi nga ana e klubit. Të kontaktuar dje nga “Panorama Sport”, kapiteni dhe mbrojtësi i krahut e kanë justifikuar mosprezencën në stërvitje, me faktin se janë të dëmtuar. “Nuk jam pezulluar. Jam i dëmtuar dhe nuk po stërvitem me asnjë ekip”, është shprehur fillimisht Veliu, ndërsa beratasi Arbri deklaroi: “Nuk e di nga janë hapur këto fjalë sa i përket pezullimit tim. Thashetheme mund të ketë shumë, por unë di të them se jam i dëmtuar në kofshë. Kjo është e vërteta”.

Fakti që edhe nga ana e klubit nuk është dalë dje me një komunikatë zyrtare për pezullimet, ka bërë që edhe lojtarët të “driblojnë”, por burime të sigurta të gazetës sqarojnë se gjithçka është fakt i kryer, teksa në ditët në vijim pritet të flasë vetë Idrizi. Kontratat – Nuk ka asnjë klauzolë në kontrata që mban lojtarët në Vlorë pas dështimit dhe daljes nga objektivat. Sipas marrëveshjes që futbollistët e Flamurtarit kanë bërë në fillim të sezonit me klubin, zgjidhja e kontratës bëhet në mënyrë të menjëhershme nëse ekipi pëson katër humbje radhazi.

Në një kohë që Flamurtari regjistron shtatë humbje, prishja e kontratës bëhet edhe më e lehtë. Por, lojtarët jo vetëm do të largohen, por edhe do të ndëshkohen. Të njëjtat burime sqaruan dje se të huajt e afruar në janar, do të ndëshkohen financiarisht. Pritet që lojtarëve t’u mbahen rrogat e fundit, por edhe një vlerë prej 30% e kontratës. Këtu futet mos rimbursimi 20% i TVSHsë, por edhe 10% gjobë për dështimin. Mendohet se i njëjti penalizim do të jetë në fuqi për të gjithë lojtarët e Flamurtarit, por kjo mbetet për t’u parë.

NDIQE LIVE "PANORAMA TV"

---