Elbasani ka shënuar një progres të qartë nga sezoni 2024–2025 në atë 2025– 2026, duke reflektuar rritje si në rezultate, ashtu edhe në pjekurinë e skuadrës. Në edicionin e kaluar, verdheblutë u renditën në vendin e 5-të, me një bilanc relativisht të balancuar, por pa arritur të shndërrojnë barazimet e shumta në fitore dhe me një diferencë negative golash.

Sezoni aktual ka sjellë një tjetër realitet për Elbasanin. Me të njëjtin numër ndeshjesh të zhvilluara, skuadra është ngjitur në vendin e 2-të, ka thuajse dyfishuar numrin e fitoreve dhe ka reduktuar ndjeshëm humbjet. Një nga ndryshimet më të dukshme është faza mbrojtëse, nga 28 gola të pësuar sezonin e kaluar, Elbasani ka zbritur në vetëm 17, duke ndërtuar një mbrojtje më të qëndrueshme dhe më kompakte.

Edhe në aspektin e pikëve diferenca është e ndjeshme. Elbasani ka grumbulluar 13 pikë më shumë krahasuar me sezonin e kaluar, ndërsa ka shndërruar një pjesë të mirë të barazimeve në fitore, çka tregon për një skuadër më vendimtare në momentet kyçe të ndeshjeve. Pavarësisht se numri i golave të shënuar ka mbetur thuajse i njëjtë, eficienca dhe menaxhimi i rezultateve kanë bërë diferencën. Të gjitha këto tregues e paraqesin Elbasanin e këtij sezoni si një ekip më konstant, më ambicioz dhe realisht konkurrues për zonën e sipërme të tabelës.

PANORAMASPORT.AL

---