Largimi i Hasan Likës, kaos për trajnerin e ri te Vllaznia
Vllaznia është shumë pranë sig urimit edhe matematikisht të biletës që e rikthen në Superiore pas një viti mungesë. Shkodranët janë të qetë, 11 pikë më shumë se dy ndjekësit më të afërt, ndërsa ekipeve u kanë mbetur edhe nga gjashtë takime për të luajtur deri në fund të sezonit. Tri ditë më parë, tekniku Hasan Lika zyrtarizoi largimin nga Vllaznia, pasi do të udhëtojë drejt Amerikës për të jetuar aty. Ndërsa, drejtuesit e klubit janë në kërkim të emrit të ri që do të drejtojë skuadrën në vazhdim.
DILEMAT Burime të sigurta në klubin kuqeblu bëjnë të ditur se ka disa dilema për sa i përket çështjes së teknikut. Drejtuesit janë të dyzuar nëse duhet të zgjedhin një trajner për dy muajt në vazhdim që i kanë mbetur këtij kampionati, ku praktikisht Vllaznia e ka arritur synimin, apo të zgjedhin që tani emrin e teknikut që të drejtojë skuadrën në Superiore sezonin e ardhshëm. Një tjetër pikë që mban peng këtë çështje është e lidhur me zgjedhjet vendore që do të mbahen në fund të qershorit. Dihet tashmë se klubi i Vllaznisë është 100% pronë e bashkisë. Në një situatë të tillë, kryebashkiakja Ademi mund të mos jetë më në krye të bashkisë dhe në këtë mënyrë, edhe drejtuesit aktualë të klubit nuk kanë asgjë të sigurt për vazhdimësinë e tyre. Kjo ka sjellë edhe dilemat për sa i përket zgjedhjes së trajnerit të ri.
LIKA Ndërkaq, në një prononcim për gazetën në lidhje me largimin e trajnerit dhe objektivin e skuadrës, kapiteni Gilman Lika shprehet: “Nuk ka asgjë që ndryshon situatën në ekipin tonë. Ne jemi në rrugën e duhur për të qenë në Superiore. Tekniku Lika na solli deri në këtë moment dhe tashmë na mbetet vetëm të sigurojmë ngjitjen edhe matematikisht. Besoj se e kemi siguruar elitën me 99%. Gjej rastin ta falënderoj trajnerin Hasan Lika për punën shumë të mirë që ka bërë dhe këto muaj që kaluam së bashku. Duhet të shohim përpara dhe të fokusohemi në sfidat që kanë mbetur. Dëshiroj që në vazhdim të fitoj edhe një titull me Vllazninë. Është një dëshirë e imja që të festoj një herë me ekipin e zemrës. Besoj se Vllaznia do të rikthehet në nivelet më të larta të futbollit shqiptar, aty ku i takon”, përfundoi prononcimin e tij, kapiteni i shkodranëve, Gilman Lika.
