Java e katërt në Grupin B ka nxjerrë në pah një Partizan B të pathyeshëm, që po udhëheq me autoritet kampionatin me 12 pikë të plota dhe asnjë gol të pësuar. Pas tij, Oriku dhe Bylis B tregojnë se nuk do të heqin dorë lehtë nga gara për kreun.

Në zonën e poshtme, Tomori dhe Eagle janë në një situatë alarmante, mes mungesës së pikëve dhe tifozëve të pakënaqur. Ndërkohë, tensionet dhe episodet e debatueshme, ankthi për dëmtimet nuk munguan në disa sfida të kësaj jave.

Maliqi – Partizani B 0-2

Kryesuesit nuk gabojnë as në transfertë, ku të kuqtë e drejtuar nga trajneri Oltjon Kërnaja mbeten të pamposhtur në kampionat. Në një nga transfertat më të vështira, Partizani B tregoi forcë dhe pjekuri. Pas një pjese të parë të kujdesshme, të kuqtë goditën fort në të dytën me golat e Gjuzi dhe Gogës. Fundi i ndeshjes u tensionua dhe solli nga një karton të kuq për secilën skuadër, Gjuzi në të 85-ën dhe Agolli në të 87-ën, por kryeqytetasit ruajtën avantazhin dhe rezultatin perfekt deri më tani.

Eagle – Butrinti 0-3

Butrinti tregoi sërish se është skuadër me cilësi, duke marrë fitoren e dytë radhazi dhe bindëse në transfertë. Ndeshja u ndërpre për rreth 10 minuta për shkak të protestave dhe ofendimeve ndaj arbitrit, që pretendoi se u ndje i kërcënuar në fushë. Në minutën e 67-të, gjyqtari Dashnor Veizaj ndërpreu ndeshjen duke iu drejtuar dhomave te zhveshjes, ndërsa dy ekipet qëndruan në fushë. Mësohet se shkak u bë debati me Limanin e Eagle, i cili pati ankesa për gjykimin dhe u ndëshkua me karton të verdhë. Pas 10 minutash konsultimesh, gjyqtari rinis lojën. Pas rifillimit, Butrinti shënoi edhe dy herë të tjera dhe e mbylli takimin me një fitore të pastër. Për Eagle, situata bëhet gjithnjë e më shqetësuese, ndërsa edhe dëmtimi i rëndë i Limanit shton telashet në skuadër.

Tomori – Bylis B 0-1

Tomori nuk po e gjen dot ritmin në këtë kampionat, duke marrë humbjen e tretë në katër ndeshje dhe duke ngecur në fund të klasifikimit. Nga ana tjetër, Bylis B merr një fitore të pastër dhe shumë të vlefshme në një fushë “të rëndë” si Berati, duke treguar se është pretendent i vërtetë për ngjitje. Takimi ka patur edhe një moment të vështirë, që ka krijuar panik në radhët e të dy skuadrave dhe stafet. Në minutën e 45-të, pas një ndërhyrje të Vrapit, braziliani Bruno mbeti i shtrirë në pistën e stadiumit. Duke parë që nuk lëvizi, u afruan stafet e të dy ekipeve dhe më pas hyri autoambulanca që e shoqëroi në spitalin e Beratit. Atu u konstatua se Bruno kishte thyer dy brinjë. Të premten Bruno u ndëshkua me karton të kuq në ndeshjen e Superiores, Flamurtari-Bylis, ndërsa dje e nisi titullar me Bylis B.

Delvina – Shkumbini 1-0

Një moment, piëkrisht goli i Nikollës në minutën e 47-të, i dhuroi Delvinës 3 pikë shumë të rëndësishme. Sfida ishte e fortë fizikisht, me raste të pakta, ndërsa vendasit ruajtën me fanatizëm avantazhin deri në fishkëllimën finale. Delvina konfirmon ritmin e mirë në këtë start sezoni.

Devolli – Oriku 0-1

Një ndeshje e fortë dhe e luftuar, ku Oriku humbi një penallti në fundin e pjesës së parë, por arriti të gjejë golin vendimtar në minutat shtesë. Falë këtij triumfi, skuadra e Orikumit mbetet e pamposhtur dhe e dytë në renditje, me një mbrojtje që ende nuk është thyer në këtë sezon.

Kategoria e Dytë

Grupi B

Java 4

26 tetor, 14:00

Maliqi – Partizani B 0-2

Gjuzi 67’, Goga 73’

Delvina – Shkumbini 1-0

Nikolla 47’

Eagle – Butrinti 0-3

Kordoba 57’, 90+2′, Okoroçuku 90+5’ (aut)

Tomori – Bylis B 0-1

Sulovari 24’

Devolli – Oriku 0-1

Shkreli 90’

Këlcyra – pushim

RENDITJA

 

                  TOTALI            

Nr EKIPI        N    P    F    B    H    G+/G-

1 Partizani B   4    12   4    0    0    13-0

2 Oriku         4    10   3    1    0    8-0

3 Bylis B       4    10   3    1    0    7-4

4 Butrinti      3    6    2    0    1    6-3

5 Delvina       3    6    2    0    1    7-4

6 Maliqi        3    6    2    0    1    6-5

7 Shkumbini     4    3    1    0    3    4-7

8 Devolli       3    3    1    0    2    2-5

9 Tomori        4    1    0    1    3    2-5

10 Këlcyra      3    1    0    1    2    2-8

11 Eagle       4    0    0    0    4    2-13

Java 5, 2 nëntor

Partizani B – Delvina

Oriku – Maliqi

Bylis B – Devolli

Butrinti – Tomori

Këlcyra – Eagle

Shkumbini – Pushim

A.Dushku/ E.Spahiu- PANORAMASPORT.AL

---