Vllaznia udhëton drejt Durrësit nesër ku do të luajë me Teutën dhe në prag të kësaj sfide në konferencë për shtyp doli drejtori sportiv, Vioresin Sinani. Ai u shpreh që luajnë për 3 pikë dhe deklaroi se Dodaj do të jetë me ekipin nesër. Sinani foli edhe për dëmtimet te shkodranët si dhe luftën e gjatë që i pret përpara për titullin.

“Një ndeshje mjaft e vështirë me një ekip të fortë, na pret një përballje e ashpër, luajmë për 3 pikë dhe shkojmë për fitore në Durrës. I vlerësojmë maksimalisht, por shkojmë për 3 pikë. Unë shpresoj që po, 2026 ka nisur mirë, ta mbajmë këtë ritëm, është herët për të folur për objektivat e majit, rruga është e gjatë. Të gjithë janë të kënaqur sidomos me fillimin e këtij viti, ekipi po kthehet te lojat e bukura, dëmtimet e 5-6 lojtarëve kanë zgjatur shumë dhe na kanë prishur punë, kthehen edhe nja 2 mbrojtës.

Dros ka pasur dëmtimin më të vështirë dhe gjatë, por javës tjetër kthehet besoj. Jam i kënaqur me të gjithë për të mirën e skuadrës, janë përkushtuar, rruga është e vështirë dhe uroj që në fund të dalim faqebardhë. Dodaj e ka forcuar organikën, është një forcë e shtuar, është djali i shtëpisë, organika është e plotë për ta përballur deri në fund, mund të ketë ndonjë surprizë në minutën e fundit . Dodaj do të udhëtojë me skuadrën në Durrës, për minuta e di trajneri. Kemi luftë të fortë përpara javë pas jave, sot që jemi në vend të parë them nuk fitohet në janar, do të bëhet hyzmeti deri në fund që ta mbajmë.

Vllaznia ka kontigjentin e duhur për të dy trofetë, kanë bërë mjaft mirë deri tani dhe kam besim që do të vazhdojnë kështu. Gjini është shumë lojtar i rëndësishëm për ne, por kemi lojtarë për të zëvendësuar. Jemi koshientë që është garë e fortë dhe luftë deri në fund dhe uroj që të jemi kështu deri në fund. Edi është lokomotiva që tërheq këtë skuadër, besoj shumë që me djemtë të bëjnë më të mirën dhe në fund të buzëqeshim. Ne shkojmë kudo për 3 pikë si brenda dhe jashtë, kemi emër të madh.

Problemi më i madh i këtij sezoni ishte prej mungesave të skuadrave, kanë ndikuar ata, me rikthimin e tyre edhe Vllaznia ka bërë mirë. Të gjithë kemi marrëdhënie të mirë dhe po punojmë për të marrë maksimumin për Vllazninë”, përfundoi Sinani.

PANORAMASPORT.AL

 

---