Besëlidhja vazhdon të jetë një nga klubet më aktive të Kategorisë së Parë në merkaton verore. Drejtuesit lezhjanë po ndërtojnë një skuadër konkurruese për sezonin e ri, duke afruar futbollistë me përvojë dhe cilësi. Pas transferimeve të Lorenc Trashit dhe Stivian Jankut, klubi ka zyrtarizuar edhe një tjetër përforcim të rëndësishëm.

Bëhet fjalë për qendërmbrojtësin Ardit Topallaj, i cili do të veshë fanellën e Besëlidhjes në sezonin 2026- 2027. Mbrojtësi 26-vjeçar vjen pas një eksperience të rëndësishme në futbollin kosovar dhe atë turk. Ai spikati me fanellën e Ferizajt në Superligën e Kosovës, çka i hapi rrugën transferimit te Hatayspor në Turqi. Sezonin e fundit, Topallaj ishte pjesë e Trepçës ’89, ndërsa tani pritet të jetë një nga shtyllat e repartit difensiv të skuadrës lezhjane.

Zyrtarizimi i tij u bë përmes një njoftimi në faqen zyrtare të klubit. “Ardit Topallaj firmos për Besëlidhjen. Mbrojtësi 26-vjeçar vjen në Lezhë pas një eksperience të pasur në skuadra të ndryshme të Gjermanisë dhe Superligës së Kosovës”, thuhet në reagimin e klubit. Me afrimin e Topallajt, Besëlidhja konfirmon ambiciet për të qenë një nga skuadrat protagoniste në Kategorinë e Parë dhe për të luftuar për objektivat e sezonit të ri.

ABDULLA DUSHKU-PANORAMASPORT.AL

---