Kur dukej se gjithçka po shkonte në favor të bardhebluve, Partizani është rikthyer fuqishëm në gjysmëfinalet “play off” të kampionatit kombëtar të basketbollit për femra.

Të kuqet kanë shënuar fitoren e dytë radhazi në derbin kundër Tiranës, duke e barazuar serinë në 2-2. Takimi djeshëm në “Asllan Rusi” dhuroi rivalitet, ndërsa në fund festa u takoi skuadrës së Eliverta Bujarit, që triumfoi me rezultatin 64-62 (16-18, 18-7, 14-18, 16- 19). Një takim shumë i luftuar, me Partizanin që e bëri diferencën në periodën e dytë, megjithatë Tirana arriti të reagonte mirë.

Gjithçka u vendos në sekondat e fundit me një gjuajtje të saktë për 2 pikë nga Dasia Evans. Lauren Carter me 20 pikë, Najiyah PackMaddox me 18 dhe Ornela Lalaj me 13 pikë e 12 kërcime shkëlqyen në suksesin e Partizanit. Tashmë skuadra që do të sfidojë Flamurtarin në finale do të vendoset në takimin e pestë dhe të fundit gjysmëfinal.

PANORAMASPORT.AL

---