Trajneri i Astanës, Grigori Babajan, foli sot para mediave në prag të sfidës së Ligës së Konferencës të skuadrës së tij ndaj Dinamos duke kujtuar të kaluarën e këtij ekipi në “Elbasan Arena” ku kishte shënuar më parë një kualifikim europian.

Ai pranoi vështirësitë e Astanës, por theksoi se ato nuk duhet të ishin justifikim për skuadrën që do tentonte kualifikimin përballë Dinamos.

“Jemi të lumtur që jemi këtu sot, në këtë stadium ku në vitin 2023 arritëm fazën e grupeve të Ligës së Konferencës për herë të parë në historinë tonë. Më parë, po, kishim luajtur në fazat e grupeve të Ligës së Kampionëve dhe Ligës së Europës, por kjo ishte hera e parë që kishim arritur ta bënim këtë në këtë stadium. Atëherë luanim kundër Partizanit.

Por nesër do të luajmë kundër një ekipi tjetër, gjithashtu shqiptar, gjithashtu një ekip shumë i fortë, dhe është një skenë krejtësisht e ndryshme. Pra, e kuptojmë vështirësinë dhe e dimë se sa cilësore është Dinamo. E njoh shumë mirë trajnerin nga ndeshjet kundër Ballkanit dhe mund të them me siguri se ata janë një ekip shumë i gjallë me mbajtje të mirë të topit. Dhe statistikisht, për sa i përket mbajtjes së topit, ata janë më të mirët në kampionat, ne i kemi këto të dhëna.

E kuptojmë se do të ketë presion që nga minutat e para, se ata do të përpiqen të na imponojnë stilin e tyre të lojës, por ne duhet të bëjmë gjithçka që mundemi për t’u larguar nga këtu me një rezultat të rehatshëm. E kuptojmë që ishte një udhëtim shumë i vështirë, udhëtimi zgjati 18 orë dhe udhëtimi i kthimit do të jetë saktësisht i njëjtë. Por u thashë lojtarëve “Kjo nuk mund të shërbejë në asnjë mënyrë si justifikim për ne. Po, duhet të dalim dhe të përfaqësojmë Astanën dhe Kazakistanin nesër dhe t’i përfaqësojmë me dinjitet”.

Ndryshimet? Nuk mendoj se ka ndonjë kuptim të flasim për këtë tani. E diskutuam në fillim të sezonit. Janë rreth tetë lojtarë që ishin me ne vitin e kaluar, të cilët nuk janë me ne sot për shkak të vështirësive financiare.

Por njerëzit që janë këtu sot, lojtarët që punojnë me ne, e kuptojnë plotësisht përgjegjësinë dhe ne kemi bërë çmos që ata që do të dalin në fushë nesër të jenë në gjendje optimale, si mendore ashtu edhe fizike, në mënyrë që të mund të luajmë mirë nesër. Kjo është arsyeja pse po i lëmë mënjanë të gjitha problemet e klubit dhe as nuk duam të flasim për to, në mënyrë që të mos shpërqendrohemi.

Bashiç mbërriti dje. Së pari, ai kishte një turne kaq të gjatë në Kupën e Botës, diferenca e orareve, plus ata kishin një udhëtim shumë të gjatë që andej, ndaj ai ishte në shtëpi për katër ditë. Ky pushim ishte absolutisht i nevojshëm për të sepse ai ishte duke u përgatitur atje për një kohë shumë të gjatë, pothuajse një muaj dhe kishte punuar me ekipin kombëtar boshnjak për më shumë se një muaj, kështu që i dhamë tre ose katër ditë për të pushuar. Ai na u bashkua vetëm mbrëmë. Dhe sot do të jetë seanca e tij e parë stërvitore, dhe ai nuk është gati ende dhe ka rreziqe të caktuara nëse e vendosim menjëherë në formacionin titullar”, tha trajneri i kazakëve para mediave.

PANORAMASPORT.AL

---