S tadiumi “Santiago Bernabeu” nuk ka qenë fatsjellës për Realin këtë sezon dhe skuadra e Zidanit ka pasur gjithmonë probleme për t’i fituar ndeshjet. Ky është një nga problemet që mendohet të ketë ekipi “galaktik” për sfidën e sotme, pasi humbi me Juventusin, barazoi me Totenhemin, humbi me Barcelonën, barazoi me Atletikon e Madridit dhe Atletikon e Bilbaos.

Por ka një fakt që i “ngroh” spanjollët në prag të ndeshjes më të rëndësishme të sezonit dhe ai është Kristiano Ronaldo. Ylli portugez vjen pas 9 ndeshjesh, duke gjetur golin në shtëpinë e tij dhe sytë e tifozëve janë drejtuar pikërisht nga ai. Për më tepër, mbrëmjen e sotme portugezi do të kërkojë fitoren e 100-të në Ligën e Kampioneve. Në Mynih arriti fitoren e 99-të, duke kaluar Kasijasin, ndërsa sot do të synojë një shifër jubilare. Zinedin Zidan karikon ekipin e tij përpara këtij dueli duke thënë se do patjetër fitoren për të shkuar në finale. Zizu kërkon mbështetjen e tifozëve për këtë duel të rëndësishëm të vitit.

NDESHJA E VITIT- “Është gjysmëfinalja e Ligës së Kampioneve dhe e dimë rëndësinë që ka. Dimë gjithashtu se çfarë duhet të bëjmë. Ajo që bëmë në ndeshjen e parë ishte e duhura, por tani na mbeten 90 minuta të vështira dhe duam t’i fitojmë”.

ISKO DHE NAÇO- “Janë stërvitur me të gjithë ekipin dhe kam kohë deri nesër (sot) për të vendosur se çfarë do të bëj. E rëndësishme është që janë në 100 për qind të formës. Naço ka një muaj jashtë, por është gati. Do të bëjmë gjithç- ka që Isko të jetë në 100 për qind, por pa rrezikuar”.

BERNABEU- “Asnjë fitore ndaj skuadrave të mëdha në Madrid këtë sezon, por nëse do të më pyesnit se ku dua të luaj, unë do të zgjedh gjithmonë ‘Bernabeun’. Më pëlqen shumë të luaj këtu dhe jam krenar”.

E ARDHMJA– “Nuk vendoset nga ajo që do të ndodhë. Unë do të vazhdoj të jem pjesë e Realit, por ajo që ka rëndësi është ndeshja ndaj Bajernit. Duhet të mendojmë vetëm për këtë”.

FINALJA- “Të luajmë 3 finale radhazi është diçka magjike dhe madhështore. Duhet të japim shpirtin në fushë që ta arrijmë”.

BAJERNI- “Do të vijë të bëjë ndeshjen e tij. Është një klub i madh. Por nëse bëjmë  ndeshjen tonë, do të bëjmë gjëra të mëdha. Ata do të vijnë të luajnë pa komplekse”.

KARVAHAL- “Nuk e di kush do të luajë në të djathtë. Do të pres deri në momentin e fundit për të vendosur. E rëndësishme është që të gjithë duan të luajnë, qoftë edhe në mbrojtje”.

MARSELO- “Është një lojtar i rëndësishëm i këtij klubi. Është shembull për të gjithë. Ka 10 vite këtu dhe ka dhënë kontribut për të bërë histori, por edhe për të ndërtuar grup të fortë. Bën humor me të gjithë”.

Përgatiti: GENTJAN ALINANI

NDIQE LIVE "PANORAMA TV"

---