Nisin llogaritë, ja rezultatet e kundërshtarëve të mundshëm te skuadrave shqiptare në turin tjetër ne Europë
Skuadrat shqiptare kanë luajtur këtë javë ndeshjet e tyre në turin e parë në turnetë europianë ku marrin pjesë me rezultate të ndryshme. Por ndërsa kualifikimi për ta pritet të vendoset vetëm javën tjetër në ndeshjet e dyta, ka nisur menjëherë vëzhgimi i atyre që janë kundërshtarë të mundshëm nëse kalojën turin, sipas shortit të hedhur në muajin qershor.
Tirana, nëse arrin të përmbysë Dudelanzh në ndeshjen e kthimit, do të përballet me fituesen e çiftit Pjunik-Kluzh, të cilat kanë lënë gjithçka të hapur për ndeshjen e kthimit pas barazimit pa gola në Armeni në ndeshjen e parë. Ndërkohë, nëse nuk ia del, do të ndeshjet me humbësen e çiftit Zrinjski-Sherif, por këtë radhë në Ligën e Konferencës. Edhe në këtë rast, sfida e parë mes dy skuadrave është mbyllur pa gola dhe gjithçka do të vendoset në Moldavi.
Nëse Partizani kalon Saburtalo është e përcaktuar që do të ndeshet me Steaua Bukuresht, ndërsa Laçi nëse kalon turin ndaj Iskra, ndeshet me fituesin e çiftit Floriana-Petrokub. Sfida e parë në fushën e maltezëve është mbyllur 0-0.
Ballkani barazoi me Zalgiris Vilnius sfidën e parë dhe nëse kalon turin, ndeshet me fituesen e çiftit Malmo-Vikingur. Suedezët fituan me vështirësi 3-2 ndeshjen e parë ndaj islandezëve që mbetën me 10 lojtarë që në pjesën e parë të duelit. Nëse nuk ia del, vazhdon rrugëtimin në Ligën e Konferencës ndaj skuadrës nga San Marino, La Fiorita.
Nëse Drita kalon turin ndaj Inter Turku, e pret Antverp, ndërsa Gjilanin e pret Jang Bojz. Përmbysja e Llapit ndaj Buduçnost mund të sjellë një përballje ndaj fituesit të çiftit Santa Koloma-Breidablik me sfidën e parë në Andorra që është mbyllur me suksesin 0-1 të ekipit islandez.
Shkupi mundi 3-0 Linkoln Red Imps dhe duket i sigurt drejt turit të dytë, ku e pret Dinamo e Zagrebit. Nëse ndodh çudia dhe eliminohet, atëherë në Ligën e Konferencës e pret humbësja e duelit Tobol-Ferencvarosh që e mbyllën 0-0 sfidën e parë mes tyre.
Kurse Shkëndija ka një ndeshje të planifikuar nga shorti ndaj Valmiera të Letonisë nëse kalon turin përballë Ararat Jerevan.
Rivalët e mundshëm të Tiranës
Pjunik-Kluzh 0-0
Zrinjski-Sherif 0-0
Rivalët e mundshëm të Laçit
Floriana-Petrokub 0-0
Rivalët e mundshëm të Ballkanit
Malmo-Vikingur 3-2
Rivalët e mundshëm të Shkupit
Tobol-Ferencvarosh 0-0
Rivalët e mundshëm të Llapit
Santa Koloma-Breidablik 0-1
PANORAMASPORT.AL
NDIQE LIVE "PANORAMA TV"