Në një përballje mes Interit dhe Juventusit nuk mungojnë asnjëherë polemikat, aq më tepër kur ndeshja vlen një trofe dhe si zakonisht, këto polemika kanë të bëjnë me arbitrimin.

Superkupa e Italisë e fituar nga zikaltrit nuk ka kaluar pa episode të diskutueshme dhe shpesh gjatë 120 minutave arbitri Daniele Doveri është ndeshur me protestat e të dyja skuadrave, por më tepër të zikaltërve.

Episodi i parë i diskutueshëm ka ardhur në minutën e 11-të, atëherë kur një kontakt në zonë mes Barelës dhe Kielinit është bërë shkak për diskutime të shumta, ndërkohë që i dyti i përket penalltisë së akorduar në favor të Interit.

Në përfundim të sfidës ka qenë Graciano Çezari që ka bërë moviolën e ndeshjes.

“Në kontaktin mes Barelës dhe Kilenit Doveri nuk është në pozicionin e favorshëm për të gjykuar, ndaj ka edhe kontroll nga VAR-i.

Nëse e shikojmë është Barela ai që shkakton faull ndaj Kielinit dhe nëse Doveri do e kishte parë rastin tamam, mungon një goditje dënimi në favor të Juves”, u shpreh ish-arbitri, që më pas u ndal edhe te penalltia.

“Xheko në këtë rast tregohet shumë i zoti dhe arrin t’ia rrëmbejë penalltinë De Shiljos, i cili bie pre. Është penallti e qartë dhe nuk ka vend për diskutim”, përfundoi analizën Çezari.

Ndërkohë që diskutime ka pasur edhe për rrëzimin e MeKenit në zonën zikaltër pas dorës së ngritur të Bastonit, që është vlerësuar si ndërhyrje e pamjaftueshme për faull nga Doveri, vendim i konsultuar edhe me sistemin VAR.

PANORAMASPORT.AL

NDIQE LIVE "PANORAMA TV"

---