Kamza është në negociata me mbrojtësin kroat Ivan Fushtar. Burime të “Panorama Sport” në klubin kamzali treguan dje se drejtuesit janë pranë marrëveshjes me qendërmbrojtësin kroat, i cili ka luajtur dy sezone më parë te Flamurtari. Për herë të fundit, 27-vjeçari ka qenë pjesë e RNK Split në Kroaci. Bëhet fjalë për një mbrojtës cilësor, teksa mësohet se ka kërkuar një pagë prej 3 mijë eurosh në muaj.

Miqësorja

Kamza ka fituar minimalisht ndaj Ilirisë dje, në miqësoren e zhvilluar në Fushë-Krujë. Skuadra e sapongjitur në elitë e ka shfrytëzuar këtë test për të parë lojtarët e ardhur në provë, përfshi edhe dy rusë dhe një kosovar. E megjithatë, Ramadan Ndreu nuk ka mbetur i kënaqur dhe sidomos nga rusët që ka vendosur t’i largojë menjëherë.

Pjesa e parë pati raste nga të dyja kampet, por pa gola. Në fraksionin e dytë, të dy teknikët shfrytëzojnë kohën e mbetur për të parë dhe lojtarët e tjerë që kishin në dispozicion. Te Kamza futet Fukui, rusët Simonov dhe Matsukov e kosovari Mustafa si dhe lojtarët e tjerë. Po kështu pati edhe në kampin tjetër. Në të 55-ën Kurti del i vetëm përballë Halilit, por portieri neutralizon rrezikun.

Në të njëjtën lartësi tregohet edhe portieri i sapofutur Ziri, pas tentativës së Lames. Kur dukej sikur do mbyllej pa gola, në të 75-ën zhbllokohen shifrat. Aksion i kamzalinjve dhe faull diagonal me portën jashtë zonës. Ekzekuton me mjeshtëri Lame dhe Ymeri zhytet bukur me kokë duke e mposhtur portierin Ziri. Minutat e mëvonshme nuk dhanë ndonjë mundësi për shënim nga asnjëra skuadër.

Ramadan Ndreu për mediat u shpreh: “Ky test na shërbeu për të parë gjendjen e grupit, por edhe për të parë lojtarët e vetofruar, siç ishin dy rusët, apo dhe ndonjë lojtar tjetër, por që nuk dhanë atë që ne presim. Kështu që ne do t’i largojmë ata”.

ABDULLA DUSHKU

NDIQE LIVE "PANORAMA TV"

---