Humbi shumë raste, por i dha fitoren ekipit, lojtari i Besëlidhjes justifikohet: E patën fajin këpucët
Besëlidhja mori fitoren e radhës ndaj Tërbunit, duke iu afruar kreut që mbahet nga Kastrioti në 4 pikë. Lezhjanët fituan më parë 3-0 me Partizanin në Kupën e Shqipërisë, ndërsa ndaj pukjanëve me vështirësi e gjetën golin, ndoshta duke e marrë disi lehtë, por rëndësi kishte fitorja. Si në shumë ndeshje, Besëlidhja humbi shumë raste ndaj Tërbunit, një ndeshje që duhet të mbyllej me një fitore të thellë.
Milan Gjorgjeviç, mesfushori që me golin e tij i dhuroi 3 pikët Besëlidhjes, kishte shumë raste të tjera, por pa mundur t’i finalizonte.
Për “Panorama Sport”, 34-vjeçari tregon kënaqësinë e golit të fitores dhe nervozizmin e penalltisë së mohuar.
“Ndeshja – Besëlidhja e vërtetë është ajo u pa ndaj Partizanit në Kupë. Ndonëse në ndeshjet e Kupës deri tani jemi paraqitur dinjitozë, objektiv madhor kemi kampionatin, pasi duam që në fund të këtij sezoni ta rikthejmë Besëlidhjen në Superiore, aty ku e meriton. Pas ndeshjes me Partizanin u ndeshëm me Tërbunin në kampionat, një ndeshje që e vlerësuam aq sa i takonte kundërshtarit dhe e fituam atë. Po, fituam minimalisht, por rëndësi kishin tri pikët dhe kënaqësi është që nuk pësuam. Ndaj Tërbunit e dominuam ndeshjen gjatë gjithë kohës me lojë dhe shumë raste, por vetëm njëri u finalizua dhe për këtë jam mjaft i lumtur që pas shumë përpjekjesh shënova. Duhej të shënonim që në pjesën e parë, por na u mohua një penallti e pastër që, të them të drejtën, na demoralizoi. Më pas u bëmë nervozë dhe kjo ndikoi negativisht në rastet para portës kundërshtare. Ishte një penallti 100% e sigurt. Pas pushimit u relaksuam fizikisht, por falë Zotit edhe nervozizmin e ulëm dhe e ndryshuam pozitivisht lojën, duke shënuar”, thotë fillimisht Gjorgjeviç.
Këpucët – Kam humbur shumë raste, nuk e di pse, gjithsesi fajësova këpucët dhe i ndërrova. Rezultoi e suksesshme, ndaj nuk i kam “akuzuar” kot. Tani po mendojmë për dy sfidat e radhës që i kemi një për Kupë ndaj Partizanit dhe ndaj Burrelit për kampionat. Të dyja këto sfida dëshirojmë t’i kalojmë me sukses dhe do t’ia dalim, për këtë jam i sigurt. Këtë fundjavë e kemi pushim, por do të stërvitemi intensivisht për të realizuar objektivat që përmenda më lart. Golin ia dedikoj familjes sime që e kam larg dhe që e dua shumë”, shprehet në fund lojtari serb.
PRENG GJIKOLA
NDIQE LIVE "PANORAMA TV"