“Fanella më është bërë si lëkurë e dytë”, postimi emocionues i Musollit: Isha i detyruar për t’u larguar nga Kukësi

Panorama Sport | Lajmet e fundit nga sporti

Postuar: Shtator 18, 2020 | 11:51

“Fanella më është bërë si lëkurë e dytë”, postimi emocionues i Musollit: Isha i detyruar për t’u larguar nga Kukësi

Besar Musolli luajti ndeshjen e fundit me Kukësin ditën e djeshme ndaj Volfsburgut, teksa ka vendosur të largohet nga verilindorët për t’u rikthyer në Kosovë, ku tashmë do të vazhdojë karrierën te skuadra e Gjilanit.

musolli

Pas largimit, mesfushori ka bërë një postim emocionues në rrjetet sociale, ku shprehet se largimi nga Kukësi nuk ishte aspak i lehët, por i detyruar, pasi dëshironte të ishte pranë familjes dhe fëmijëve të tij. Musolli i ka falënderuar të gjithë, duke thënë se fanella e Kukësit i është bërë si një lëkurë e dytë, ku ai luante nga viti 2012.

Postimi i Musollit:

“Çdo fillim e ka dhe një fund dhe për mua ka ardhur momenti që rrugëtimin me Kukësin dhe Superioren ta mbyll këtu. Jam i lumtur që në 8 vite tek Kukësi kam arritur të fitoj gjithçka, të derdh lot gëzimi, të ngre trofe dhe të shkruaj historinë në Europë, e mbi të gjitha të mbaj në krah shiritin e kapitenit, i cili për mua peshon shumë. Jam i lumtur dhe ndihem krenar që në çdo stadium ku kam shkelur kam gjetur mikpritjen e të gjithë tifozëve dhe kam pasur respektin e tyre. Nuk kam asnjë fjalë tjetër veç falënderimeve.

Kur kam ardhur në verën e vitit 2012 nuk e kisha menduar se kjo fanellë do më kthehej në një lëkurë të dytë. Nëse do të përmend emra do të jetë e vështirë, për të mos thënë e pamundur për t’i përmendur të gjithë e nuk dua të harroj askënd. Një falënderim të madhe dhe mirënjohje të pafundme për çdo lojtar dhe pjesëtar stafi që kam pasur fatin e kënaqësinë të punoj, të mësoj e të gëzoj me ju. Nuk mund të mos falënderoj drejtuesit me në krye presidentin Safet Gjici. Nuk dua të zgjatem, pasi nuk është aspak e lehtë të shkruaj e të flas për një vendim që nuk ishte aspak i lehtë, por i detyruar. Largohem nga Kukësi me respektin maksimal, duke lënë pas vetes një histori që është shkruar me germa të arta e nuk mund ta përshkruaj me fjalë gjithë emocionin që kam ndier.

Largohem nga kampionati shqiptar për të qenë pranë familjes, e për t’iu dedikuar fëmijëve të mi. Në fund, me përulësi, dua të falënderoj çdo tifoz të Kukësit, i cili për gjatë rrugëtimit tim më ka bërë të ndihem i vlerësuar në çdo minutë. Ju jeni dhe do mbeteni gjithnjë në zemrën time, jo si tifozët e mi, por si miqtë e mi dhe ata që më keni qëndruar pranë. Ka ardhur momenti për të thënë lamtumirë, ama Kukësi do jetë gjithnjë pjesë e jetës time, si epoka më e artë e karrierës time. i juaji, Besar Musolli.”

PANORAMASPORT.AL

NDIQE LIVE "PANORAMA TV"