Në Berat e kanë pritur me qetësi dhe vlerësim pozitiv pauzën e papritur që krijoi tërheqja zyrtare e Valbonës nga kampionati. Kjo situatë, që solli gjithashtu kualifikimin automatik të Tomorit në turin e dytë të Kupës së Shqipërisë, është parë nga stafi teknik si një mundësi ideale për t’u përgatitur me qetësi për ndeshjen e radhës në kampionat, ku i pret transferta me Orikun. 

Edhe pse kalimi në turin tjetër të Kupës ishte një dhuratë, në kampin beratas nuk ka vend për vetëkënaqësi. Përkundrazi, stafi teknik e ka konsideruar këtë periudhë si një bonus për të rritur nivelin e lojës dhe harmoninë në grup. Në një prononcim për “Panorama Sport”, ndihmëstrajneri i Tomorit, ish-sulmuesi dhe kapiteni i njohur Edmond Gjata, u shpreh: “Ne jemi një skuadër me emër në futbollin shqiptar dhe si e tillë respektojmë çdo kompeticion ku marrim pjesë. Edhe Kupën e Shqipërisë do ta vlerësojmë maksimalisht, pavarësisht kundërshtarit që do të na përballë shorti.

Në rastin konkret, mospërballja me Valbonën këtë mesjavë e shohim si një mundësi shumë të mirë për të përgatitur në qetësi ndeshjen e radhës në kampionat, atë ndaj Orikut. Ky pushim na ndihmon të rikuperojmë energjitë dhe të përmirësojmë disa detaje në lojë që na duhen për sfidat e ardhshme”. Në Berat janë të bindur se objektivi i Tomorit mbetet rikthimi në zonën e lartë të renditjes, dhe për këtë arsye çdo ndeshje në kampionat trajtohet me përkushtim maksimal.

EDI SPAHIU- PANORAMASPORT.AL

---