Prej ditësh te Tirana kanë marrë pushimet, por çështja e trajnerit mbetet ende për t’u zgjidhur. Trajneri Bledi Shkëmbi ka kontratë deri në dhjetor 2025, por mbetet për t’u parë nëse ai do të ribëjë skuadrën këtë verë dhe do ta drejtojë në kampionatin e ri. Tej dyshimeve, Bledi Shkëmbi nuk është trajneri i vetëm, i cili është në dyshim për sezonin 2025-2026. Veç Tiranës, edhe katër klube të tjera janë në “ajër”. Disa skuadra kanë emëruar trajnerin e ri të skuadrës, ndërsa të tjera në Superiore nuk kanë një emër. Dhe në fund bëhen jo pak, por 50 për qind të ekipeve në elitën e futbollit.

KATËRSHJA E PARË – Egnatia, Dinamo, Vllaznia dhe Partizani kanë trajner. Rrogozhinasit nuk ndryshuan drejtimin e skuadrës, me Edlir Tetovën në krye të skuadrës. Vllaznia, e dyta, largoi Tomas Brdariçin dhe emëroi Edi Martinin, si shpëtimtarin e kuqebluve. Asnjë ndryshim nuk ka edhe te Dinamo e Partizani me Ilir Dajën dhe Skënder Gegën që mbyllën sezonin e fundit në stolat respektivë. I konfirmuar për sezonin e ri është edhe Ivan Gvozdenoviçi tek Elbasani, i cili rinovoi në fund të sezonit, duke sheshuar çdo udhëkryq.

TË PAKONFIRMUARIT – Bledi Shkëmbi është një nga të pakonfirmuarit për sezonin e ri. Ndonëse ka kontratë, ende nuk ka një vendim final për të nga ana e Tiranës. Në të njëjtën situatë ndodhet edhe Arjan Bellai i Vorës, që pret lajmet nga presidenca. Në fund të listës së dyshimeve është edhe Bledar Hodo i Teutës. Mund të qëndrojë dhe të largohet, kjo do të varet nga presidenca.

BYLISI DHE FLAMURTARI – Dy janë skuadrat në Kategorinë Superiore, që në këtë moment nuk kanë trajnerë: Flamurtari dhe Bylisi. Këta të fundit kishin në stol Gentian Mezanin, por ky i fundit është pa kontratë dhe nuk dihet nëse do të qëndrojë. Ai vetë ka deklaruar se për sezonin e ri, si fillim duhet të ulet dhe të diskutojë me drejtuesit e skuadrës. Skuadra tjetër është Flamurtari. Kuqezinjtë patën Pollozhanin në stol, por drejtuesi i skuadrës, Idrizi, e ka larguar dhe tani klubi është në kërkim të emrit të ri që do të drejtojë Flamurtarin. Shkurt, gjysma e skuadrave të Superiores është e paqartë për sa u përket teknikëve që do të drejtojnë klubet në sezonin e ri futbollistik.OLSI AVDIAJ-PANORAMASPORT.AL

---