Partizani hyn në një nga periudhat më të rëndësishme të verës, aty ku drejtuesit do të duhet të marrin vendime të rëndësishme për të ardhmen e skuadrës. Pas një sezoni të mbyllur në vendin e pestë dhe jashtë Kupave të Europës, në klub ekziston bindja se ekipi ka nevojë për ndryshime, por pa prishur bazën e grupit aktual.

Pikërisht vazhdimësia konsiderohet një nga pikat më të rëndësishme në projektin e ri të të kuqve. Në sezonin që sapo u mbyll, Partizani pati shumë luhatje në rezultate, ndërsa ndryshimet e shumta në pankinë ndikuan jo pak edhe në stabilitetin e skuadrës. Për këtë arsye, drejtuesit synojnë që fillimisht të zgjedhin trajnerin e ri dhe më pas të ndërtojnë ekipin sipas kërkesave të tij.

PROBLEMET- Në klub po analizohen me kujdes të gjitha repartet, teksa pritet që merkatoja të fokusohet kryesisht në afrimin e elementëve cilësorë dhe jo në numër të madh lojtarësh. Ideja është që skuadra të ruajë konkurrencën e brendshme, por njëkohësisht të ketë më shumë balancë dhe vazhdimësi gjatë sezonit. Një tjetër aspekt që konsiderohet shumë i rëndësishëm është edhe rikthimi i disa futbollistëve në formën më të mirë fizike.

Gjatë sezonit të kaluar, Partizani u penalizua ndjeshëm nga dëmtimet, me disa prej lojtarëve kryesorë që munguan për periudha të gjata. Kjo ndikoi jo pak në rezultatet dhe stabilitetin e ekipit. Në ambientin e të kuqve besojnë se skuadra aktuale ka cilësi, por ka nevojë për më shumë qëndrueshmëri dhe personalitet në momentet vendimtare të sezonit. Pikërisht për këtë arsye, merkatoja e verës shihet si një mundësi për të afruar lojtarë që mund të marrin përgjegjësi dhe të bëjnë diferencën në ndeshje të rëndësishme.

TRAJNERI- Një nga temat më të diskutuara mbetet edhe zgjedhja e trajnerit të ri. Drejtuesit kërkojnë një profil që njeh presionin e rezultateve dhe që është i aftë të ndërtojë një skuadër konkurruese. Në klub nuk duan të përsërisin gabimet e sezonit të fundit, ku ndryshimet e shumta në pankinë krijuan paqartësi edhe te skuadra. Trajneri i ardhshëm pritet të ketë rol të rëndësishëm edhe në merkato.

Ai do të japë mendimin e tij për futbollistët që duhet të qëndrojnë dhe për repartet ku ekipi ka nevojë për përforcime. Në këtë mënyrë, Partizani synon të ndërtojë një skuadër më funksionale dhe më të balancuar. Nga ana tjetër, drejtuesit duan të ruajnë edhe boshtin aktual të ekipit.

Futbollistë si Pano Qirko, Preka, Atanaskoski, Marku, Qaka, Ismaili, Skuka apo Toma konsiderohen elementë të rëndësishëm për skuadrën dhe mbi ta pritet të ndërtohet edhe projekti i sezonit të ri. Megjithatë, nuk përjashtohen as largimet. Për disa lojtarë pritet të ketë interes gjatë merkatos së verës dhe në rast ofertash të rëndësishme financiare, klubi mund të marrë në konsideratë shitjen e tyre. Kjo lidhet edhe me faktin se mungesa në Kupat e Europës do të ndikojë në të ardhurat e klubit.

TË RINJTË- Një tjetër objektiv i rëndësishëm për Partizanin mbetet aktivizimi i lojtarëve të rinj. Gjatë sezonit të kaluar, disa talente të akademisë morën minuta me ekipin e parë dhe bindën me paraqitjet e tyre. Në klub besojnë se akademia duhet të vazhdojë të prodhojë futbollistë për ekipin e parë. Të kuqtë synojnë që sezoni i ardhshëm të jetë krejtësisht ndryshe nga ai që sapo u mbyll.

Objektivi kryesor mbetet rikthimi në garën për trofetë dhe sigurimi i pjesëmarrjes në Kupat e Europës. Për një klub me historinë e Partizanit, vendi i pestë nuk konsiderohet rezultat i pranueshëm. Pikërisht për këtë arsye, vera shihet si një moment shumë i rëndësishëm për të ndërtuar një skuadër më të fortë, më të qëndrueshme dhe më konkurruese për të ardhmen.

PANORAMASPORT.AL

---