Humbja e fundit në Shkodër ka lënë gjurmë në kampin e Egnatias, jo aq për rezultatin në vetvete, sesa për momentin e sezonit në të cilin erdhi.

Rrogozhinasit kryesojnë renditjen, por diferencat janë ngushtuar ndjeshëm dhe çdo gabim i radhës mund të kushtojë shtrenjtë. Për këtë arsye, ndeshja ndaj Elbasanit, ndjekëses më të afërt, shihet si një pikë kthese vendimtare në ecurinë e skuadrës. Takimi i radhës është shumë më tepër sesa një ndeshje e zakonshme kampionati. Luhet drejtpërdrejt për vendin e parë dhe për qetësinë në vazhdim.

Një humbje tjetër do të bënte që Elbasani ta arrinte Egnatian në krye të renditjes, ndërsa skuadrat e tjera do të përfitonin për t’u afruar, duke e kthyer garën për titull në një luftë edhe më të ashpër. Pikërisht për këtë arsye, në Rrogozhinë kërkohet reagim i menjëhershëm, si në rezultat, ashtu edhe në lojë. Trajneri Edlir Tetova ka punuar gjatë gjithë javës në aspektin psikologjik dhe taktik, duke kërkuar nga lojtarët përqendrim maksimal dhe rikthim te identiteti që e ka shoqëruar skuadrën në pjesën më të madhe të sezonit. Mesazhi është i qartë: gabimet e Shkodrës duhet të mbeten pas dhe ndeshja me Elbasanin duhet të shërbejë si pikënisje për një seri të re pozitive.

RIKTHIMET – Në një moment kaq delikat, Egnatia merr edhe lajme inkurajuese nga rikthimet. Kapiteni Albano Aleksi është gati të rikthehet, duke sjellë stabilitet dhe autoritet në mesfushë. Prania e tij pritet t’i japë më shumë qetësi skuadrës në ndërtimin e lojës dhe në menaxhimin e momenteve të vështira të ndeshjes. Përveç Aleksit, rikthehet edhe Altin Kryeziu, një tjetër element i rëndësishëm në mesfushë. Këto rikthime i japin Tetovës më shumë zgjedhje në formacion dhe mundësi për ndryshime taktike gjatë ndeshjes. Me një mesfushë më të plotë, rrogozhinasit synojnë të kontrollojnë ritmin e lojës dhe të mos lejojnë Elbasanin të imponohet.

PËRKRAHJA – Një rol të veçantë në këtë përballje pritet të luajë edhe mbështetja e tifozëve. Në Rrogozhinë, klubi ka nisur prej ditësh mobilizimin për të pasur sa më shumë sportdashës në stadium. Fletëpalosjet e shpërndara në qytet janë një ftesë e drejtpërdrejtë për tifozët që të jenë pjesë e kësaj ndeshjeje vendimtare dhe të japin kontributin e tyre nga tribuna. Atmosfera pritet të jetë e ndezur, me Egnatian që kërkon ta shfrytëzojë maksimalisht faktorin fushë. Lojtarët janë të ndërgjegjshëm se mbështetja e tifozëve mund të bëjë diferencën, veçanërisht në një ndeshje me presion të lartë, ku çdo detaj ka rëndësi. Në përfundim, ndeshja ndaj Elbasanit shihet si një provë karakteri për Egnatian. Një fitore do të forconte pozitat në krye dhe do t’i jepte skuadrës besim për vazhdimësinë, ndërsa çdo rezultat tjetër do të hapte një kapitull të ri pasigurie në garën për titull. Në Rrogozhinë, të gjithë e dinë se kjo është një nga ato ndeshje që mund të përcaktojnë sezonin.

VLADIMIR MEMA-PANORAMASPORT.AL

---