Për të ardhur keq që një derbi “katandiset” me afro 500 të pranishëm në tribuna. Ishte aq qetësi, sa edhe në televizion dëgjoheshin bisedat e futbollistëve. Gjithsesi, nuk munguan ultrasit e kuq, që mbështetën skuadrën gjatë gjithë sfidës.

“Panorama Sport” ju sjell disa nga momentet pikante të ndeshjes së djeshme, ku Dinamo mposhti minimalisht Partizanin në “Elbasan Arena” me gol të Zabërgjës. Kronika e këtij derbi mund të përkufizohet me spektakël në fushë dhe heshtje anës saj, në tribuna.

* Para startit të sfidës, u bëhet një kontroll rrjetave nga ana e punëtorëve, duke qenë se ka ndodhur shpesh që të kenë probleme, edhe për shkak të ndeshjeve të shumta që luhen. U mendua t’u paraprinë problemeve pa i kontrolluar asistentët.

* Ekipet e nisin ndeshjen me një minutë heshtje në nderim të Saimir Demit. Gazetari i njohur sportiv u nda nga jeta pak ditë më parë në moshën 57-vjeçare pas një sëmundjeje të rëndë.

* Trajneri i Dinamos, Ilir Daja, tërbohet me Meksin pas një krosimi jo të saktë të tij, duke i thënë: “O Meksi, po pse kroson kot mo, gjithë ajo zonë e lirë aty për të ecur dhe shkon e kroson”.

* Pas një largimi jo të mirë të topit nga ana e Qirkos, është kapiteni Preka ai që ia bën me shenjë që ta marrë qetësisht dhe të tregojë kujdes.

* Kapuçat e xhupave shërbejnë për të dy trajnerët, Daja dhe Abilaliaj, si mburojë për t’u mbrojtur nga shiu, që e shoqëroi sfidën në pjesën më të madhe të saj. Fatmirësisht terreni i stadiumit të Elbasanit është fantastik dhe nuk pati probleme.

* Për afro tetë minuta skuadra e Dinamos luajti me një lojtar më pak. Pas dëmtimit të Lorran që lë fushën e lojës, nuk kishte asnjë futbollist të gatshëm për ta zëvendësuar, derisa futet Rufati.

* Starti i pjesës së dytë u vonua paksa për faktin se përkoi me iftarin. Nga ajo sa u pa, i vetmi që me sa duket agjëronte nga ekipet në fushë, ishte mbrojtësi i Dinamos, Agron Rufati.

PANORAMASPORT.AL

---