Vangjel Mile ka 55 ditë në krye të Tiranës, ndërsa sfida e tij është të arrijë të paktën të mbyllë një sezon me bardheblutë. Ose më saktë rrezikon të mos mbyllë muajin shtator si trajneri i kryeqytetasve.

Dhe shkak janë bërë paraqitjet e fundit të skuadrës. Mes trajnerit dhe klubit vihet re një “ngrirje” kjo për shkak të rezultateve, barazim në Ballsh dhe humbje me Vorën. Zyrtarisht, klubi Tirana e ka konfirmuar Vangjel Milen në krye të skuadrës, por një rezultat ndryshe nga fitorja, pikërisht në përballjen me Flamurtarin e vë në në pozita jo komode si trajnerin dhe Tiranën. Çka do të thotë se Mile dhe bardheblutë mund të ndajnë rrugët nëse situata vazhdon të jetë e tillë. Një fat të tillë e kanë pasur edhe shumë trajnerë të tjerë.

E KALUARA E AFËRT – Tirana ka kaluar një periudhë të trazuar në stolin teknik, ku ndryshimet e shpeshta kanë bërë që bardheblutë të kërkojnë stabilitet dhe rezultate të menjëhershme. Në pak më shumë se dy vite, 5 trajnerë të ndryshëm kanë kaluar në krye të ekipit, duke reflektuar presionin e madh që vjen nga pritshmëritë e tifozëve dhe drejtuesve. Ky cikël tregon një të vërtetë të hidhur për klubet e mëdha shqiptare, kur pritshmëritë janë të larta, çdo gabim mund të kushtojë shtrenjtë. Tirana ka arritur gjithmonë të gjejë mënyra për të rikthyer energjinë dhe ritmin e fitoreve.

JULIAN AHMATAJ – Pas “epokës Shehi”, Julian Ahmataj ishte trajneri që hapi këtë cikël të trazuar. Ai drejtoi 19 ndeshje në 137 ditë, me një mesatare 1.42 pikë për ndeshje, duke ofruar rezultate të qëndrueshme dhe një fillim relativisht pozitiv. Mandati i Ahmatajt tregoi se ekipi mund të funksionojë mirë nën një drejtim të qartë, megjithëse koha e tij në stol ishte e kufizuar dhe presioni për rezultate të menjëhershme mbeti i lartë.

ERBIM FAGU – Pas largimit të Ahmatajt, Erbim Fagu mori drejtimin e ekipit dhe dha një performancë të mirë. Me 16 ndeshje në 131 ditë dhe 1.44 pikë për takim, ai arriti të ruajë konkurrencën e Tiranës dhe të mbajë moralin e lojtarëve të lartë. Fagu tregoi se, edhe në një periudhë të shkurtër, mund të sjellë rezultate pozitive dhe stabilitet të përkohshëm.

BLEDI SHKËMBI – Mandati i parë i Bledi Shkëmbit ishte një periudhë sfiduese. Ai drejtoi 14 ndeshje në 127 ditë, me 0.86 pikë për ndeshje, një rezultat më i ulët krahasuar me trajnerët e tjerë të ciklit. Shkëmbi u përball me sfida të ndryshme, përfshirë ndërrimet taktike dhe mungesën e stabilitetit në ekip, gjë që e bëri të vështirë realizimin e rezultateve të larta.

GUGASH MAGANI – Gugash Magani ishte trajneri me mandat më të shkurtër në këtë periudhë, vetëm 75 ditë dhe 10 ndeshje, ku arriti 0.7 pikë për ndeshje. Rezultatet e dobëta dhe presioni i lartë bënë që largimi i tij të vinte shumë shpejt. Mandati i Maganit tregon se te Tirana nuk ka kohë për të eksperimentuar dhe çdo trajner duhet të japë performancë të menjëhershme.

BLEDI SHKËMBI – Në mandatin e tij të dytë, Bledi Shkëmbi tregoi se është trajneri që mund të rikthejë ekuilibrin. Në 149 ditë dhe 15 ndeshje, ai arriti 1.6 pikë për ndeshje, duke sjellë performancë pozitive dhe një ritëm të qëndrueshëm. Rikthimi i tij shënoi një frymë të re për ekipin dhe për tifozët, duke rikthyer shpresën se stoli mund të stabilizohet dhe Tirana të rifitojë dominimin në kampionat. Ky cikël i trajnerëve tregon se Tirana ka kërkuar vazhdimisht kombinimin mes rezultateve dhe stabilitetit, por pritshmëritë e larta dhe presioni i menjëhershëm kanë bërë që stoli të jetë i paqëndrueshëm.

OLSI AVDIAJ-PANORAMASPORT.AL

---