Situata në kampin bardheblu është futur sërish në një fazë pasigurie pas largimit të Orges Shehit nga drejtimi i Tiranës. Burime pranë klubit bëjnë me dije se presidenti Refik Halili ka mbetur i zhgënjyer nga ky vendim, i cili ka ardhur në një moment ku drejtuesit prisnin vazhdimësi dhe stabilizim të skuadrës.

Sipas të njëjtave burime, në klub nuk është pritur që Shehi të ndërpriste bashkëpunimin në këtë periudhë, sidomos pasi më herët i ishte kërkuar që të vazhdonte punën dhe t’i jepte kohën e nevojshme klubit për të rregulluar situatën brenda ekipit. Pikërisht për këtë arsye, vendimi i tij është konsideruar i papritur dhe i vështirë për t’u menaxhuar në aspektin sportiv dhe organizativ.

Në rrethin e ngushtë të drejtuesve, largimi i Shehit është interpretuar si një zhvillim i befasishëm, madje është cilësuar si një “goditje e papritur”, duke pasur parasysh se ai ishte pjesë e një projekti që synonte stabilizimin e skuadrës pas një periudhe me shumë ndryshime në pankinë.

Shehi kishte marrë përsipër një situatë jo të lehtë, me Tiranën që kërkonte të gjente ekuilibrin dhe identitetin e saj pas lëvizjeve të shumta të trajnerëve në sezonet e fundit. Megjithatë, ndarja me të ka hapur një tjetër kapitull paqartësie për klubin, duke e detyruar drejtimin të rishikojë menjëherë planet për të ardhmen.

TRAJNERI I RI – Në këto kushte, drejtuesit e Tiranës janë vënë menjëherë në lëvizje për të gjetur një trajner të ri. Në listën e prioriteteve mbetet një profil që mund të sjellë stabilitet, të ndërtojë një projekt afatgjatë dhe të përballojë presionin e madh që shoqëron pankinën bardheblu.

Klubi ndodhet në një moment delikat, ku çdo vendim për pankinën mund të ketë ndikim të drejtpërdrejtë jo vetëm në ecurinë e sezonit, por edhe në drejtimin e përgjithshëm të projektit sportiv në vazhdim.

PANORAMASPORT.AL

---