Pas një jave pune intensive në Slloveni, kuqeblutë kanë hyrë tashmë në etapën përmbyllëse të grumbullimit veror, me fokusin që zhvendoset gjithnjë e më shumë te sfida e parë zyrtare e sezonit. Stafi teknik ka shfrytëzuar maksimalisht këtë periudhë për të rritur ritmin fizik të skuadrës, por edhe për të konsoliduar idetë taktike për sezonin e ri.

Gjatë qëndrimit në Slloveni, Vllaznia ka zhvilluar disa ndeshje miqësore, të cilat i kanë shërbyer trajnerit për të testuar skema të ndryshme loje, për të parë nga afër gjendjen e futbollistëve dhe për t’u dhënë minuta edhe afrimeve të reja.

Pavarësisht se rezultatet nuk kanë qenë gjithmonë ato të dëshiruara, në kampin shkodran vlerësojnë se ndeshjet kanë qenë të rëndësishme për rritjen e nivelit të ekipit dhe për të evidentuar aspektet që kërkojnë përmirësim. Tashmë kuqeblutë ndodhen në fazën finale të përgatitjeve dhe ditët e mbetura në Slloveni do të shërbejnë për të përsosur detajet e fundit. Intensiteti i stërvitjeve pritet të ulet gradualisht, ndërsa vëmendja do të përqendrohet te freskia fizike dhe harmonizimi i grupit përpara nisjes së sezonit.

Kthimi i Vllaznisë në Shkodër pritet më 2 ose 3 korrik, ku skuadra do të vijojë përgatitjet në shtëpi. Pikërisht aty do të nisë numërimi mbrapsht për sfidën më të rëndësishme të kësaj periudhe, atë ndaj Malishevës në turin e parë kualifikues të Conference League, takim që konsiderohet objektivi i parë madhor i sezonit për shkodranët.

Me vetëm një javë që ndan Vllazninë nga debutimi europian, pritshmëritë janë që skuadra të paraqitet në formën më të mirë të mundshme. Stafi teknik synon që deri në ndeshjen me Malishevën të ketë gjetur formacionin ideal dhe balancën e duhur, me besimin se puna e zhvilluar gjatë fazës përgatitore në Slloveni do të reflektohet në fushë në momentin kur të nisë zyrtarisht sezoni 2026-2027.

PANORAMASPORT.AL

---