Florin Bratu pritet të nisë shumë shpejt zyrtarisht aventurën e tij në krye të Partizanit, duke marrë drejtimin e një skuadre që synon të lërë pas zhgënjimin e sezonit të kaluar dhe të rikthehet menjëherë mes pretendenteve për titull.

Për teknikun rumun, muajt e parë do të kenë një rëndësi vendimtare, pasi pikërisht në këtë periudhë do të vendosen themelet e projektit të ri dhe do të krijohet marrëdhënia e tij me skuadrën, drejtuesit dhe tifozët. Një nga gabimet që Bratu duhet të shmangë është nxitimi për të ndryshuar gjithçka brenda një kohe shumë të shkurtër. Çdo trajner ka filozofinë e tij, por një skuadër nuk transformohet brenda pak javësh dhe as nuk mund të përvetësojë menjëherë të gjitha idetë taktike. Për këtë arsye, rumuni duhet të ndërtojë ndryshimet në mënyrë graduale, duke respektuar edhe karakteristikat e futbollistëve që do të ketë në dispozicion.

MENAXHIMI- Po aq e rëndësishme do të jetë edhe mënyra se si ai do të menaxhojë grupin. Partizani ka në organikë lojtarë me eksperiencë dhe personalitet, të cilët kanë mbajtur peshë të rëndësishme në sezonet e fundit. Fitimi i besimit të tyre që në javët e para do ta ndihmonte trajnerin të krijonte një ambient pozitiv, ku çdo futbollist të ndihet pjesë e projektit dhe të japë maksimumin në stërvitje e në ndeshje. Një tjetër aspekt që kërkon kujdes është eksperimentimi i tepërt. Faza përgatitore është momenti ideal për të provuar skema dhe variante të ndryshme, por me afrimin e kampionatit skuadra duhet të ketë tashmë një strukturë të qartë loje. Ndryshimet e vazhdueshme në formacion apo në rolet e futbollistëve mund të krijojnë paqartësi dhe të pengojnë ndërtimin e automatizmave që janë të domosdoshëm gjatë sezonit.

VARËSIA NGA INDIVIDËT Bratu duhet të shmangë gjithashtu krijimin e një varësie të tepruar nga disa emra të caktuar. Sezoni është i gjatë, kalendari është i ngarkuar dhe dëmtimet apo pezullimet janë pjesë e futbollit. Për këtë arsye, ai duhet të punojë që çdo futbollist të jetë gati për të dhënë kontributin e tij, duke ndërtuar një skuadër ku diferencën ta bëjë grupi dhe jo vetëm individët. Edhe merkatoja do të kërkojë ekuilibër. Trajneri i ri pritet të japë mendimin e tij për afrimet, por është e rëndësishme që zgjedhjet të bëhen sipas nevojave reale të skuadrës dhe jo vetëm mbi bazën e emrit apo eksperiencës së lojtarëve. Partizani ka nevojë për futbollistë që përshtaten me filozofinë e trajnerit dhe që rrisin nivelin e konkurrencës në çdo repart. Një tjetër gabim që duhet shmangur është nënvlerësimi i fazës përgatitore. Dy javët në Tiranë dhe më pas grumbullimi në Ohër nuk do të shërbejnë vetëm për përgatitjen fizike, por edhe për ndërtimin e identitetit të skuadrës. Pikërisht në këtë periudhë vendosen rregullat, ritmi i punës dhe kultura që trajneri dëshiron të krijojë brenda grupit.

PRESIONI DHE REAGIMI NË MOMENTET DELIKATE Nga ana tjetër, Bratu nuk duhet të lejojë që presioni i rezultateve të javëve të para të ndikojë në vendimmarrjen e tij. Partizani është një klub ku pritshmëritë janë gjithmonë të larta, ndërsa çdo barazim apo humbje shoqërohet me analiza dhe kritika. Megjithatë, një projekt i ri kërkon durim dhe vazhdimësi, ndaj vendimet nuk duhet të merren nën ndikimin e emocioneve të momentit. Një element tjetër me rëndësi është komunikimi. Trajneri rumun duhet të krijojë një raport të hapur me futbollistët, duke u shpjeguar qartë rolet dhe pritshmëritë për secilin prej tyre. Kur një skuadër e kupton qartë drejtimin që po ndjek, është shumë më e lehtë të ruhet harmoninë dhe motivimi gjatë gjithë sezonit. Po aq i rëndësishëm do të jetë edhe bashkëpunimi me drejtuesit e klubit. Vendimet për merkaton, për organizimin e skuadrës dhe për objektivat duhet të jenë të koordinuara, në mënyrë që të mos krijohen situata të panevojshme gjatë kampionatit. Një projekt fitues ndërtohet kur stafi teknik dhe drejtuesit ecin në të njëjtin drejtim. Bratu duhet të ketë parasysh edhe faktin se Partizani vjen pas një sezoni ku skuadra pësoi 48 gola dhe e mbylli kampionatin me golavarazh negativ. Kjo do të thotë se organizimi mbrojtës duhet të jetë ndër prioritetet e para, por pa sakrifikuar aftësinë e ekipit për të qenë i rrezikshëm në fazën sulmuese. Në fund, sfida e trajnerit rumun nuk do të jetë vetëm të fitojë ndeshjet e para, por të krijojë një skuadër që rritet nga java në javë dhe që jep sinjale të qarta për të ardhmen.

EJGI ÇABELI-PANORAMASPORT.AL

---