E ardhmja e Antonio Kontes mund të jetë larg Italisë. Pasi mbaroi koha e tij te Napoli, trajneri është vënë në shënjestër të Al-Itihad, një klub saudit që kërkon një trajner të ri pas ndarjes me Serxhio Konseisao më 1 qershor. Ende nuk është bërë asnjë ofertë zyrtare, por burime arabe sigurojnë se klubi është gati të paraqesë një propozim të rëndësishëm financiar.Al-Itihad po kërkon të punësojë përsëri një trajner evropian dhe e ka identifikuar Konten si kandidatin ideal, një trajner fitues, i mësuar të konkurrojë për qëllime ambicioze dhe i vlerësuar për pragmatizmin e tij. Për më tepër, në deklaratën që njoftonte largimin e Konseisao, klubi shpjegoi se vendimi u mor pas “një vlerësimi të kujdesshëm të performancave të fundit të ekipit” dhe në dritën e objektivave të klubit për të ardhmen.

Megjithatë, mbetet për t’u parë se cili do të jetë vendimi i Antonios. Një thirrje e mundshme në ekipin kombëtar italian do të ishte një përparësi kryesore, por nëse FIGC do të zgjidhte Roberto Mançinin, ish-trajneri i Napolit do të kishte në thelb dy mundësi, të merrte një pushim ose të pranonte një përvojë të re jashtë vendit, me Arabinë Saudite që aktualisht duket si destinacioni më i mundshëm.

Rikujtojmë që mbrojtësi i Kombëtares shqiptare, Mario Mitaj luan tek Al Itihad dhe do të ishte një mundësi e madhe për futbollistin të trajnohej nga Konte.

PANORAMASPORT.AL

---