Vadim Demidoviç, ish-sulmuesi i Dinamos së Minskut, ka analizuar ndeshjen që skuadra bjelloruse ka me Egnatian në Ligën e Konferencës këtë të enjte. Sipas tij, ekipi bjellorus ka shanse të përmbysë gjithçka në Rrogozhinë, por i duhet që të jetë agresiv dhe jo në pritje, siç ka bërë shpesh në ndeshjen e parë.

“Janë kundërshtarë të njëjtë. Kampioni ynë është i aftë të mundë një skuadër nga Shqipëria. Por vetëm kjo nuk është e mjaftueshme për sukses në fund të dy ndeshjeve. Dhe do të jetë më e vështirë pasi ndeshja luhet jashtë. Është e rëndësishme se kush e nis ndeshjen dhe si. Nëse Egnatia del menjëherë para, atëherë do të jetë shumë, shumë e vështirë për Dinamon. Por nëse lojtarët e Dinamos ia dalin të nisin ndeshjen në mënyrë efektive, atëherë çdo gjë është e mundur. Ndaj duhet të marrim përsipër rreziqe, të çuditim kundërshtarin, të luajmë për gjithçka. Kjo është e vetmja mënyrë.

A ndikoi historia e trajnerit Skipçenko? Mendoj se po. Largimi i tij para ndeshjesh kaq të rëndësishme është padyshim një faktor domethënës. Dhe nuk sjell asgjë të mirë. Por lojtarët e Dinamos janë profesionistë dhe tani duhet të shkëputen nga e gjithë kjo dhe të mundohen të bëjnë gjithçka të mundur e të pamundur për të arritur suksesin. Për më tepër, ata e treguan se janë në gjendje ta bëjnë një gjë të tillë, kur fituan ndeshjen e dytë ndaj Ludogorets para kohëve shtesë. Kur lojtarët e Dinamos nuk rrinë të kthyer në portën e tyre, por takojnë kundërshtarët në mënyrë aktive larg saj, atëherë ata kanë më shumë sukses në fushë. Ne duhet të tronditim Egnatian menjëherë, kjo është e gjitha. Por kur del në fushë i dorëzuar, me kokën poshtë, atëherë më mirë është të mos dalësh fare në fushë”, tha Demidoviç për mediat bjelloruse.

PANORAMASPORT.AL

---