Ky vit i ri ka nisur në mënyrën më të keqe për Partizanin sa i përket lojës dhe rezultateve në fushë. Të kuqtë në gjysmën e parë të sezonit kishin marrë vetëm dy humbje dhe ishin një nga skuadrat më solide në mbrojtje, duke ua bërë të pamundur kundërshtarëve të merrnin rezultat pozitiv përballë tyre.

Gjithçka u “shkri” si një kala rëre pas ngjarjeve të janarit dhe Partizani tashmë është një skuadër që mund ta mposhtë çdo kundërshtar. Të kuqtë në harkun e pak më shumë se tre muajve janë mposhtur plot tetë herë, çka përbën shifra shqetësuese.

Nëse në gjysmën e parë të sezonit i kishte mposhtur vetëm Vllaznia dhe Bylisi, në pjesën e mbetur të sezonit ata janë mposhtur nga Egnatia, Bylis e Vllaznia sërish, Elbasani, Dinamo e Tirana. Të kuqtë janë qartësisht në një krizë të thellë rezultatesh dhe loje dhe kur kanë mbetur edhe 90 minuta nga fundi i sezonit, duhet të fitojnë kundër Elbasanit për të marrë pjesë në “Final 4”.

PANORAMASPORT.AL

---