Barazimi 1-1 në “Elbasan Arena” nuk ishte rezultati që verdheblutë kërkonin, por as ai që ua zbeh shpresat për kualifi kim. Përkundrazi, mënyra sesi u zhvillua ndeshja e parë ka rritur besimin në kampin elbasanas se kalimi në raundin e dytë të Ligës së Konferencës është një objektiv plotësisht i arritshëm.

Në letër, BATE Borisov mbetet skuadra me emrin më të madh, por fusha tregoi një tjetër histori. Elbasani jo vetëm që nuk u step përballë një rivali me eksperiencë të madhe europiane, por në shumë momente ishte skuadra që dominoi lojën, krijoi më tepër raste dhe dha përshtypjen se ishte më pranë fi tores. Tashmë gjithçka do të vendoset në 90 minutat e kthimit në Azerbajxhan, aty ku verdheblutë do të udhëtojnë me bindjen se mund të shkruajnë historinë.

PARAQITJA – Argumenti i parë që i jep besim Elbasanit është pikërisht ajo që tregoi në ndeshjen e parë. Skuadra e Ivan Gvozdenoviç luajti pa komplekse ndaj një kundërshtari që për vite me radhë ka qenë pjesë e fazës së grupeve në kompeticionet europiane. Verdheblutë mbajtën ritmin e lojës, fi tuan shumë duele në mesfushë dhe krijuan disa raste të pastra për shënim. Në shumë momente ishte BATE ajo që u detyrua të mbrohej, ndërsa Elbasani kërkonte vazhdimisht golin e dytë. Për një skuadër që është ndërtuar pothuajse nga e para gjatë merkatos së verës, paraqitja ishte një sinjal pozitiv.

RASTET – Një tjetër arsye pse Elbasani duhet të besojë është fakti se krijoi më shumë raste të pastra se kundërshtari. Ardit Nikaj ishte vazhdimisht një shqetësim për mbrojtjen bjelloruse, ndërsa edhe Hebaj, Diallo dhe futbollistët e repartit ofensiv prodhuan situata që mund të ishin fi nalizuar më mirë. Nëse verdheblutë do të kishin treguar më shumë qetësi para portës, rezultati mund të kishte qenë krejtësisht ndryshe. Kjo tregon se skuadra ka potencialin për të goditur edhe në ndeshjen e kthimit, mjafton të jetë më efi kase në momentet vendimtare.

BATE – Pavarësisht emrit dhe historisë që mbart, BATE Borisov nuk dha përshtypjen e një skuadre të pakalueshme. Bjellorusët patën vështirësi në ndërtimin e aksioneve dhe krijuan pak raste të pastra, ndërsa goli i barazimit erdhi më shumë si pasojë e një momenti mosvëmendjeje në mbrojtjen e Elbasanit sesa nga dominimi në lojë. Edhe forma jo e mirë që BATE po kalon në kampionatin vendas u refl ektua në fushë, duke lënë të kuptohet se kjo skuadër është larg nivelit që kishte disa vite më parë. Pikërisht për këtë arsye, në kampin verdheblu ekziston bindja se diferencat mes dy ekipeve janë minimale.

GRUPI – Një tjetër element pozitiv është se Elbasani pritet të jetë edhe më i konsoliduar në ndeshjen e kthimit. Shumë prej afrimeve të verës luajtën për herë të parë së bashku në një sfi dë zyrtare dhe, megjithatë, skuadra tregoi organizim dhe harmoni. Me disa ditë shtesë stërvitjeje, pritet që automatizmat të funksionojnë edhe më mirë, ndërsa futbollistë si Hebaj, Epitauks apo Aleksovski do të jenë edhe më të ambientuar me pjesën tjetër të grupit. Kjo mund të jetë një pikë e rëndësishme në favor të Elbasanit.

90 MINUTAT – Asgjë nuk është vendosur ende. Barazimi 1-1 e lë plotësisht të hapur çështjen e kualifi kimit dhe Elbasani ka treguar se ka cilësitë për ta synuar kalimin e turit. Sigurisht, do të kërkohet një ndeshje me shumë përqendrim, pasi çdo gabim në këtë fazë mund të kushtojë. Megjithatë, verdheblutë udhëtojnë drejt Azerbajxhanit me më shumë besim sesa dyshime. Nëse do të përsërisin paraqitjen e ndeshjes së parë dhe do të tregohen më cinikë para portës, atëherë shanset për të arritur kualifi kimin e parë europian në historinë e klubit janë reale.

VLADIMIR MEMA-PANORAMASPORT.AL

---