Egnatia ka nisur sot zyrtarisht fazën përgatitore në Bansko të Bullgarisë, aty ku kampionët e Shqipërisë do të përgatiten me seriozitet maksimal për sfidat që i presin në arenën europiane këtë verë.  

Bansko ofron kushte optimale infrastrukturore dhe një klimë më të favorshme, në kontrast me temperaturat përvëluese që kanë përfshirë vendin tonë gjatë ditëve të fundit. 

Nën drejtimin e trajnerit Edlir Tetova, skuadra ka nisur punën me intensitet të lartë, duke vendosur në qendër të vëmendjes aspektin fizik dhe harmoninë në grup. Grupi është tashmë i plotë, pas mbërritjes së sulmuesit kosovar Selmani, ndërkohë që më herët janë bashkuar edhe përforcimet nga Brazili dhe Armenia – pjesë e një merkatoje të ndërtuar me kujdes dhe vizion nga drejtuesit e klubit. 

Ky është një moment kyç për konsolidimin e skuadrës. Pas triumfit në Superiore, Egnatia nuk ndalet, por kërkon të shtrijë suksesin edhe përtej kufijve. Objektivi është i qartë: kalimi i disa tureve në Ligën e Kampionëve dhe përfaqësimi dinjitoz i futbollit shqiptar në skenën ndërkombëtare. 

PANORAMASPORT.AL

---