Marshimi i kohëve të fundit ka ritëm titulli, por duke pasur parasysh distancën e tmerrshme nga Interi, kjo duket si një çështje thjesht statistikore. Megjithatë, nëse do të duhej pak qetësi në kampionat, atëherë nuk mund të mohohet se fitorja ndaj Napolit, e kombinuar me humbjen e Juventusit mund të shihen vetëm si ilaçi më i mirë i mundshëm në funksion të Ligës së Europë, i vetmi objektiv madhor i mbetur për Stefano Piolin dhe Milanin e tij.

Ren mbërrin nesër në “San Siro” dhe bëhet fjalë për një skuadër shumë të bezdisshme dhe e freskët nga një seri rezultatesh që nuk janë të papërfillshme: 6 fitore radhazi në kampionat, me disa fitore të rëndësishme si ato ndaj Nisës dhe Lionit. 1/16 në Kupën e Francës me eliminimin e Marsejës me penallti dhe humbjen e fundit në kampionat që daton më 9 dhjetor.

Me pak fjalë, në letër një rival brenda mundësive, por edhe një kundërshtar për t’u marrë parasysh që shënon shumë (17 gola në 6 ndeshjet e fundit) dhe nuk lejon shumë në mbrojtje (5 gola të pësuar në të njëjtën periudhë).

MOMENTI KUQEZI – Çka do të thotë se ata që presin një shëtitje e kanë gabim dhe se pragu i vëmendjes duhet mbajtur shumë lart. Nga ana e tij, pavarësisht disa shqetësimeve të vogla (dy fitore të vështira me përmbysje kundër Udinezes dhe Frozinones dhe shumë gola të pësuar), momenti i Milanit është gjithashtu më se pozitiv:

5 fitore dhe një barazim në 2024, 7 fitore, 2 barazime dhe asnjë humbje në nëntë ndeshjet e fundit të kampionatit. Të gjitha me sulmin e dytë të turneut (47 gola) ku mungojnë, vetëm, golat nga Rafael Leaos i cili nuk shënon prej shtatorit, por ndërkohë ka rritur sasinë e pasimeve vendimtare.

DYSHIME FORMACIONI – Ndërkohë, e sotmja dhe e nesërmja do të përdoren nga Pioli për të qartësuar idetë e tij për formacionin anti-Ren: Kalabria nuk do të jetë, i dëmtuar dhe në vend të tij do të vendoset Florenci. Në mesfushë, do të kthehet Reijnders dhe do të bashkohet me njërin mes Adlisë ose Benaser, pavarësisht se nuk mund të përjashtohet as përdorimi i Musahut.

Siguritë janë përpara, me Pulisiç, Loftus dhe Leao pas Zhirusë teksa në portë, përsëri Menja që nuk mund të preket. Për pjesën tjetër të linjës mbrojtëse ka një dyshim të vogël që lidhet me Kjaer, i cili nuk është në gjendje perfekte: nëse nuk rikuperohet në maksimumin e tij, Teo do t’i bashkohej Gabias në qendër me Terraçianon në të majtë. Një hipotezë mund të jetë edhe aktivizimi i të shëruarit Malik Çau.

PANORAMASPORT.AL

NDIQE LIVE "PANORAMA TV"

---