Për Gentjan Mezanin, dje ka qenë ndeshja e parë si trajner i ri i Flamurtarit. Ai u emërua zyrtarisht të martën si “timonieri” i të kuqve dhe administratori Idrizi ka thënë se do ta drejtojë ekipin deri në fund të sezonit. Mezani është gjithmonë emri i parë që preferohet për të drejtuar skuadrën sa herë largohen trajnerët që e nisin sezonin me bujë. Kështu ndodhi edhe sezonin e kaluar apo edhe më parë.

Pas takimit të djeshëm, Mezani u shpreh: “Ne e kishim vlerësuar këtë takim, por kishim 4 mungesa. I kisha lënë pushim këta futbollistë pasi primare për ne është kampionati. Loja e të dy ekipeve ka qenë mjaft e bukur dhe e fortë. Barazimi ishte i drejtë për ne. Falënderoj drejtuesit dhe tifozerinë pukjane për mikpritjen”.

Tashmë, e gjithë vëmendja e skuadrës do të përqendrohet në kampionat. Pas largimit të Maganit, Mezani merr përsipër një detyrë jo të lehtë. Fillimisht, do të synohet të rikthehet skuadra te rezultatet pozitive.

D. PEMA

---