Andi Ribaj në provë te Partizani, në lojë edhe Mazrekaj
Gjatë ditës së sotme është zhvilluar një ndeshje miqësore mes Partizanit B dhe Dinamos në kompleksin “Internacional” në Pezë. Takimi është fituar nga të kuqtë me shifrat 2-1 dhe golat janë shënuar nga 2 futbollistët e talentuar Vatnikaj dhe Jaupaj në minutat 20 dhe 35.
Kjo miqësore ishte e rëndësishme për Partizanin pasi që prej fillimit të saj u aktivizua sulmuesi Andi Ribaj, i cili është afruar te të kuqtë për t’u provuar dhe në rast se bind stafin teknik, atëherë do të qëndrojë për gjithë sezonin. Partizani po vuan në gjetjen e golit dhe është duke shqyrtuar çdo opsion të mundshëm për të përforcuar skuadrën në fazën ofensive.
Postimi i Partizanit në Facebook
Ndërkohë në këtë miqësore është aktivizuar si titullar edhe mesfushori Mentor Mazrekaj, çka do të thotë që ai e ka pranuar tashmë rolin e tij brenda skuadrës dhe i është bindur vendimit të stafit teknik për ta kaluar atë te ekipi B deri në një vendim të dytë. Para disa ditësh, me anë të një postimi në profilin e tij në Facebook, Mazrekaj mohoi të kishte një konflikt mes tij dhe stafit teknik.
