Penalltitë janë kthyer në çështje te Partizani. Pasi nuk kishin fituar asnjë deri në mars, përgjatë pesë ndeshjeve të fundit, kampionat dhe kupë, janë fituar tri penallti.

Në të tre rastet, nuk kanë munguar kërkesat e lojtarëve të ndryshëm për të goditur. E para ishte ndaj Dinamos rreth dy javë më parë. Bintsuka, i cili fitoi penalltinë, kërkoi edhe ta godiste. Në fund ishte Domgjoni që e ekzekutoi, ndërsa u ndal nga traversa. Derbi me dinamovitët rezultoi dhe ndeshja e fundit e Abilaliajt në krye të pankinës.

Penalltia e radhës u fitua në Kupë ndaj Egnatias. Ishte Keko që e fitoi dhe pikërisht ai e goditi. Në gjysmëfinalen e parë të Kupës ra në sy Zeka, që mori topin dhe kërkoi të gjuante. Gega nuk dha aprovim nga pankina.

Episodi i fundit ishte po ndaj Egnatias, këtë herë për kampionat. Kote e fitoi 11-metërshin ndaj kampionëve, ndërsa Eleke dëshironte ta gjuante. Në fund e mori përsipër Keko, i cili mposhti Dajsinanin në të dytën përballje.

Tri penallti që shohin tre sulmues në konkurrencë brenda ekipit. Në fund, Gega ia beson Kekos që e ka shpërblyer me dy gola të rëndësishëm deri tani.

PANORAMASPORT.AL

---