Mesfushori i Tiranës, Ian Soler, ka bërë një rrëfim special të karrierës së tij për gazetarin Gorka Urresola nga “Air Albania”, ku ka treguar të gjithë rrjedhën e eksperiencës së tij të gjatë në futbollin e luajtur, duke e cilësuar veten si një “nomad” për shkak të numrit të madh të skuadrave që ka qenë pjesë. Në rrëfimin e tij, Soler ka folur me superlativa për Shqipërinë dhe për klubin e Tiranës në veçanti. 

 

“Pasi luajta në Serie C italiane me një ekip që po vuante probleme me mospagesat, lindi opsioni i Tiranës, koha për të luajtur përsëri në një kategori të lartë evropiane. 

E rinovova kontratën janarin e kaluar. Klubi është shumë i kënaqur me mua dhe unë me ta. Është për të ardhur keq për rezultatet. Barazuam shumë sezonin e kaluar, diçka që nuk më kishte ndodhur kurrë në karrierën time. Por edhe kështu, mund të thuash se ky është ekipi më i madh në Shqipëri. 

Shqipëria është një nga vendet ku jam ndjerë më rehat. Njerëz shumë të respektueshëm në jetën e përditshme, si jashtë ashtu edhe brenda klubit. Është ekipi me më shumë tituj, dhe kështu të bëjnë të ndihesh. 

Shqipëria surprizon. Në një moment kalon nga një realitet në tjetrin. Shikon qytete ku ende kanë shumë për të zhvilluar, por pastaj mbërrin në Tiranë dhe e gjen veten në një kryeqytet evropian. 

Ndonjëherë mund të duket si një fjalë përçmuese, por mendoj se është një gjë pozitive. Në shumë vende do të kisha dashur stabilitet, por për shkak të lëndimeve ose sepse merr oferta më interesante, përfundon duke menduar të largohesh. 

EKSPERIENCA TEK ALMERIA- Është një vit që shumë njerëz e lënë pas dore, por që më shërbeu për të më rikthyer në rrugën e duhur. 

PROVA TE FULHAM- Përjetova momente brutale, si Krishtlindjet, kur festohet Dita e Dhuratave dhe fushat janë plot, por distanca la gjurmë tek unë dhe më ndihmoi shumë që të kthehesha. 

MALAGA- Një surprizë shumë e këndshme. Arrita vetëm për të luajtur për ekipin rezervë, por pas disa javësh isha duke u stërvitur me Michelin në ekipin e parë. Jam i sigurt se nëse ai sezon te Malaga do të kishte qenë i mirë, do të kisha luajtur edhe për një minutë në Divizionin e Parë. 

VAZHDIMI I KARRIERËS- Papritmas në shtator më telefonuan nga Sllovakia. Ata po kërkonin profile të ngjashme me të miat. Nuk kisha ku të shkoja, sepse ishte e thënë ndryshe ose të prisja si agjent i lirë deri në janar. Ishte sikur të hidhje një monedhë në ajër . Mihalovce ishte një ekip shumë i thjeshtë, shumë afër kufirit me Ukrainën, dhe atje arritëm të kualifikoheshim për Ligën e Evropës. Ata gjithmonë më kujtonin se isha një nga kapitenët e parë të huaj. 

Futbolli në Poloni është një shpërthim. Në fakt, është hapi për të shkuar në një ligë të madhe dhe gjithçka filloi shumë mirë atje. Por fantazmat e lëndimeve u rikthyen.  Zagłębie Lubin kishte një parashikim për të shkuar në Europa League , ata kishin shpenzuar një buxhet shumë të lartë dhe në fakt është paga më e madhe që kisha marrë ndonjëherë, por aty gjuri im filloi të dështonte. 

“Tani që jam në Shqipëri këtë moshë, mund të them se pjekuria është e vërtetë. Di si t’i lexosh ndeshjet shumë më mirë. Di ku të sulmosh, ku të mbrohesh, çfarë i duhet trupit tënd, çfarë t’i kërkosh trajnerit, shokëve të ekipit. 

“Unë jam nomad,” thotë ai me një buzëqeshje, “Më pëlqen të udhëtoj, por të paktën duhet të rri në shtëpi për dy ose tre ditë”, përfundoi Soler.  

PANORAMASPORT.AL

---