Partizani i sezonit 2014/15 kishte një ekip simpatik, që e mbylli në renditje pas Skënderbeut dhe Kukësit të kohëve të arta. Shpëtim Duro ishte arkitekti i të kuqve, që në kampionat regjistruan 73 pikë në 36 ndeshje. Me mesataren 2.03 pikë për ndeshje, padyshim që aktualisht do të ishin pretendentët kryesorë për titull kampion.

Duro është bërë nostalgjik, pasi Endri Vrapi postoi një foto të asaj periudhe. Bashkë me ish-mbrojtësin janë edhe Arbnor Fejzullahu, Amir Rrahmani, Ardian Cuculi, Nderim Nexhipi dhe Lorenc Trashi.

“Duhet ta plotësoj foton. Hoxha, Mazrekaj, Batha, Raçiç, Vila. Rasti kur trajneri e ndërton skuadrën vetë dhe mban përgjegjësi ai”, shkruan Duro. Dhe pse e mbyllën pa trofe, statistikat tregojnë se Partizani i asaj kohe ishte një nga protagonistët kryesorë të kampionatit shqiptar.

PANORAMASPORT.AL

---