Abissnet Superiore ka hyrë në fazën më të nxehtë, atë ku përcaktohen verdiktet dhe një nga garat më të ndezura tashmë është ajo për mbijetesën në elitë, e cila sheh të përfshira katër skuadrat e fundit. Në bazë të rregullores, dy ekipet e fundit bien në Kategorinë e Parë, ndërsa i treti nga fundi shkon në play-out me një ekip të kategorisë më poshtë.

Në situatën aktuale, katër skuadrat në garë janë Bylisi e Vora që kanë nga 30 pikë, Tirana me 28 dhe Flamurtari me 25. Në 6 javët e mbetura, do të ketë dy përballje direkte për t’u luajtur, atë Flamurtari-Vora të javës së 31-të si dhe atë Vora-Bylis të javës së 36-të. Në këto ndeshje, fitoret praktikisht kanë vlerë të dyfishtë pasi ndalen dhe rivalët direkt për mbijetesën e mund të jenë vendimtare.

E vetmja skuadër në katërshe pa përballje me ekipet e fundit është Tirana, e cila i kreu ndeshjet e saj në 3 javët e para të fazës së katërt e tashmë do të duhet të kërkojë pikët për mbijetesën me ekipet që ka më lart në tabelën e klasifikimit e që kanë synime për titullin.

Vlen të theksohet se në sezonin e kaluar ranë nga kategoria Skënderbeu me 38 pikë dhe Laçi me 37 pikë, ndërsa Tirana shkoi në play-out me 39 pikë.

PANORAMASPORT.AL

---