EKSKLUZIVE/ I “ngujuar” prej 3 orësh me presidentin e klubit të Superiores, ish-sulmuesi i Kombëtares bëhet gati për aventurën e re (FOTO)
Sokol Cikalleshi u tërhoq nga Kombëtarja në gusht të vitit 2024 dhe prej janarit të 2025-ës, ai është pa ekip.
Duket se sulmuesi dëshiron të kthehet në Shqipëri dhe të mbyllë karrierën këtu. “Panorama Sport” mëson ekskluzivisht se Cikalleshi dhe presidenti Sinan Idrizi janë “ngujuar” në stadiumin “Flamurtari”.
35-vjeçari është prej rreth 3 orësh së bashku me Idrizin teksa po bisedojnë për një bashkëpunim të mundshëm në merkaton e janarit.
Makina e Cikalleshit përpara klubit teksa bisedon me Sinan Idrizin
Rikujtojmë që Cikalleshi numëron 60 ndeshje me fanellën e Kombëtares si edhe 13 gola të shënuar.
Gjithashtu, sulmuesi ka qenë pjesë e Shqipërisë edhe në Europianin historik “Francë 2016”, pjesëmarrja e parë e kuqezinjve në finalet e një turneu madhor. Ai debutoi me fanellën kuqezi në miqësoren Shqipëri-Rumani, të luajtur më 31 maj 2014, ndërsa paraqitja e tij e fundit me Kombëtaren ishte në miqësoren Suedi-Shqipëri të 25 marsit 2024 të luajtur në Stokholm.
ERMAL SIKA-PANORAMASPORT.AL
