Egnatia është detyruar të pranojë largimin e mesfushorit të saj golashënues, Regi Lushkja, i cili do të vazhdojë karrierën jashtë vendit, tek ekipi iranian Traktor. Ky është lajmi që ka konfirmuar vetë klubi kampion, duke e cilësuar si një nga largimet më të rëndësishme të këtij sezoni.

“Panorama Sport” mëson ekskluzivisht se Lushkja ka kushtuar iranianëve 300 mijë euro, shumë që do të përfundojë në arkën e Egnatias. Fillimisht, klubi verdhejeshil kishte marrë një ofertë prej 100 mijë eurosh nga ekipi turk Sivaspor, por ajo u refuzua menjëherë nga drejtuesit e Egnatias.

Presidenti Demrozi vendosi veton dhe e konsideroi ofertën si qesharake për një lojtar me kontributin dhe vlerën e Lushkjës. Pak kohë më vonë, në skenë doli ekipi iranian Traktor, i cili trefishoi ofertën e turqve dhe e bëri atë të papërballueshme për klubin shqiptar. Në fund, drejtuesit e Egnatias u dorëzuan, duke e lënë lojtarin të largohet dhe duke pranuar se nuk mund të refuzonin një shifër të tillë.

Largimi i Lushkjës shihet si një humbje e madhe për skuadrën verdhejeshile, pasi mesfushori ka qenë golashënuesi më i mirë i ekipit në sezonin e kaluar, me 14 gola të realizuar në kampionat. Humbja e tij krijon një boshllëk të rëndësishëm në repartin ofensiv dhe sfidon trajnerin dhe stafin drejtues të gjejnë shpejt një zëvendësues të denjë. Ky transferim nuk është vetëm një tregues i vlerës së lojtarit, por edhe i faktit që Egnatia po ndërvepron gjithnjë e më shumë në tregun ndërkombëtar të futbollit.

Largimi i Lushnjës shënon një moment të rëndësishëm në historinë e klubit, duke treguar se skuadra rrogozhinase është e gatshme të përballojë sfida të reja dhe të negociojë në nivele më të larta.

VLADIMIR MEMA-PANORAMASPORT.AL

---