Barazimi 2-2 ndaj Partizani la shije të përziera në kampin e Teuta.Në një përballje ku durrsakët treguan karakter, por edhe momente luhatjeje në lojë, mesfushori Emiliano Vila analizoi për “Panorama Sport” faktorët që munguan për të marrë maksimumin nga ndeshja, si dhe rëndësinë e pauzës 10-ditore, e cila do të shërbejë për rikuperim dhe riorganizim të skuadrës në vijim të sezonit.

Vila gjithashtu falënderon tifozët për mbështetjen e vazhdueshme, që sipas tij i japin ekipit forcë dhe shpreson që t’ua shpërblejnë me fitore në ndeshjet e ardhshme. Me këtë reflektim, Teuta duket e vendosur të përdorë pauzën për t’u përgatitur më mirë për sfidat vendimtare që e presin, duke synuar të përmirësojë qëndrueshmërinë dhe të maksimizojë potencialin e lojtarëve në pjesën e mbetur të sezonit.

Emiliano, një ndeshje e luftuar dhe një barazim 2-2 ndaj Partizanit… Si e vlerësoni këtë rezultat?

Ishte një ndeshje shumë e fortë, siç janë gjithmonë përballjet me Partizanin. Kemi bërë disa gabime, por reagimi i ekipit ishte pozitiv. Mendoj se barazimi është i drejtë në fund.

Çfarë mungoi për fitoren?

Na mungoi pak përqendrim në disa momente kyçe dhe ndoshta menaxhimi më i mirë i avantazhit. Këto janë detaje që bëjnë diferencën në ndeshje të tilla.

Pauza 10-ditore, një mundësi për rikuperim dhe përmirësim…

Pauza vjen në një moment të mirë për ne. Do të na japë kohë të rikuperojmë fizikisht dhe të punojmë më shumë në aspektet taktike. Do ta shfrytëzojmë maksimalisht për t’u përmirësuar.

Çfarë duhet përmirësuar në vazhdim?

Duhet të jemi më të qëndrueshëm gjatë gjithë ndeshjes dhe të shmangim gabimet individuale. Nëse arrijmë këtë, jam i bindur që do të marrim rezultate më të mira.

ZAMIR QYPI-PANORAMASPORT.AL

---