Xhanluixhi Bufon u tërhoq nga futbolli i luajtur në moshën 45-vjeçare ndërsa tashmë ka nisur një aventurë të re në stafin e kombëtares së Italisë, aty ku mban pozicionin e shefit të delegacionit të “axurrëve”. Ish-portieri legjendar i Italisë ka dhënë një intervistë për “DAZN”, ku është ndalur tek Juventusi klubi ku bëri historinë.

“Jam i lumtur për detyrën e re, jam mirëpritur nga të gjithë. Edhe djemtë janë treguar shumë mirëkuptues prej ditës së parë, lidhja ime me ta është shumë e ngushtë dhe kështu mund t’i besojmë njëri-tjetrit”.

Futbolli italian në Europë? Vitin e fundit nuk ishim larg të tjerëve, treguam se mund të luajmë si të barabartë. Interi, por edhe Milani nëse janë në ditë të mirë mund t’i hapin probleme edhe skuadrave si Mançester Siti apo Real Madrid.

Juventusi? Aty çdo javë del nga një çështje e re, por te Juventus nuk mërziten. Kura më e mirë është paraqitja në fushë, ajo largon çdo polemikë. Juventusi mund të konkurrojë për titullin, mund ta bënte edhe vitin e kaluar. Këtë vit nuk janë as në Kupat e Europës dhe unë shoh që pak skuadra kanë një organikë si ajo e Juventus. Interi është ekipi me më shumë kualitet, por ata kanë edhe impenjime të tjera.

Pogba dhe Bonuçi? Nuk kam shumë për të thënë. Më vjen shumë keq sepse i njoh të dy, dhe po ashtu njoh shumë mirë edhe Juventusin. Në klub ka pasur disa ndryshime dhe shumë figura janë larguar, Alegri është ende aty dhe unë nuk dua të flas sepse mund të jetë e pavend. Duhet ta njohësh mirë situatën para se të flasësh”, deklaroi Bufon.

PANORAMASPORT.AL

NDIQE LIVE "PANORAMA TV"

---