Kampionati kombëtar i basketbollit për femra ka luajtur tri takime për javën e tetë. Tirana i ka shkaktuar disfatën e parë në kampionat Flamurtarit, duke fituar kryendeshjen e javës. Vajzat bardheblu bënë një paraqitje shumë të mirë ndaj kampioneve në fuqi, duke triumfuar me rezultatin 60-59 (17-13, 15- 13, 15-17, 13-16) në një ndeshje tepër të luftuar në “Farie Hoti”.

Skuadra e drejtuar nga Mirza Alibegaj ishte në epërsi thuajse gjatë të gjithë kohës, madje duke u shkëputur deri në +12 pikë. Flamurtari provoi të reagonte në gjysmën e dytë të ndeshjes, por kryeqytetaset rezistuan, duke e mbrojtur fitoren deri në fund. Aida Palko, Morina Bojka dhe Maggie Justinak udhëhoqën vendëset në këtë sukses, me Tiranën që kap kreun e renditjes me pikë të barabarta me vlonjatet. Për Flamurtarin nuk mjaftoi Asia Henderson, autore e 15 pikëve dhe po kaq kërcimeve.

Vlonjatet, pasi humbën Superkupën ndaj Partizanit të enjten në “Feti Borova”, pësojnë kështu një tjetër disfatë në kryeqytet. Në ndeshjet e tjera, Partizani kaloi me sukses derbin kundër Studentit. Vajzat e Eliverta Bujarit fituan të shtunën në “Asllan Rusi” me rezultatin 62-80 (8-25, 17-21, 19-17, 18-17), teksa e bënë diferencën që në 10 minutat e para, për ta menaxhuar me tej me qetësi epërsinë.

Elbasani fitoi duelin e skuadrave që mbyllin tabelën, teksa mposhti Barletin në Tiranë me rezultatin 71-74 (22-16, 18-13, 14-25, 17-20). Universitaret luajtën më mirë në pjesën e parë, por në të dytën vajzat verdheblu realizuan përmbysjen në një takim me shumë rivalitet. Ndërkohë ndeshja ndërmjet Vllaznisë dhe Teutës është shtyrë për një tjetër datë.

PANORAMASPORT.AL

NDIQE LIVE "PANORAMA TV"

---