Teuta vijon përgatitjet pa ndërprerje në prag të sfidës së fundjavës ndaj Flamurtarit, me durrsakët që kërkojnë rikthimin te fitorja dhe një reagim bindës në fushë. Skuadra e “Djemve të Detit” po punon me intensitet maksimal nën drejtimin e trajnerit Dobi, teksa ndeshja e radhës në Kategorinë Superiore po afron. Në kompleksin e stadiumit “Niko Dovana”, atmosfera në kampin blu është optimale.

Stafi teknik raporton për një klimë shumë pozitive, e ndihmuar edhe nga rikthimi i disa lojtarëve nga dëmtimet, çka e ka bërë grupin pothuajse të plotë. Kjo ka rritur ndjeshëm konkurrencën për një vend në formacion, duke shtuar motivimin dhe seriozitetin në çdo seancë stërvitore. Në stërvitjet e fundit, vëmendja ka qenë e përqendruar kryesisht te repartet e mesfushës dhe sulmit, ku trajneri Dobi ka kërkuar përmirësime në ndërtimin e aksioneve, qarkullimin e topit dhe reagimin e menjëhershëm pas humbjes së tij.

Paralelisht, janë testuar edhe disa skema të reja taktike, të cilat mund të shfrytëzohen ndaj Flamurtarit, veçanërisht në fazën e presionit të lartë. “Kemi bërë përgatitje serioze dhe e dimë rëndësinë e kësaj ndeshjeje. Duam të rikthehemi me fitore dhe të kënaqim tifozët tanë”, u shpreh shkurtimisht Daniel Votlai pas seancës së fundit stërvitore.

FLAMURTARI- Nga ana tjetër, Flamurtari, pavarësisht se po kalon një periudhë të vështirë, mbetet një kundërshtar që kërkon vlerësim maksimal. Stafi teknik i Teutës ka analizuar me kujdes lojën e vlonjatëve, duke u fokusuar te mënyrat për të shfrytëzuar hapësirat në fazën e tyre mbrojtëse. Durrsakët pritet të mbështeten te forma e mirë e sulmuesve dhe eksperienca e mesfushorëve, me synimin kryesor për të marrë tri pikët dhe për të ruajtur ritmin në garën për kreun.

Sfidën e fundjavës pritet ta shoqërojë një atmosferë elektrizuese në Vlorë. Tifozët durrsakë kanë paralajmëruar mbështetje të zjarrtë për ekipin e tyre, duke shpresuar se Teuta do të vazhdojë serinë e rezultateve pozitive. Me një skuadër të konsoliduar dhe objektiva të qarta, blu-të synojnë jo vetëm suksesin e radhës, por edhe ndërtimin e një projekti të qëndrueshëm për të ardhmen.

ZAMIR QYPI-PANORAMASPORT.AL

---