Pas suksesit në ndeshjen e parë të kampionatit, Elbasani shkon në transfertë përballë Egnatias me synimin e qartë për të vazhduar me të njëjtin ritëm dhe për të marrë një tjetër rezultat pozitiv. Fitorja e parë ka rritur moralin dhe ka krijuar një atmosferë shumë optimiste në kampin verdheblu, duke treguar se skuadra është gati të rivalizojë edhe me kundërshtarët më të fortë.

Trajneri Ivan Gvozdenoviç ka në dispozicion të gjithë lojtarët për këtë sfidë, pasi nuk ka asnjë mungesë nga dëmtimet apo pezullimet. Grupi është i plotë dhe konkurrenca në çdo repart është një sinjal i qartë se verdheblutë do të udhëtojnë drejt Rrogozhinës me kartat e hapura. Stafi teknik është i kënaqur me gjendjen fizike dhe psikologjike të lojtarëve, ndërsa atmosfera brenda ekipit është pozitive. Fitorja e parë shërbeu jo vetëm për pikët në renditje, por edhe për të konsoliduar besimin se Elbasani mund të jetë një skuadër konkurruese në Superiore.

Në prag të sfidës me kampionët e Egnatias, mbeten ende disa detaje për t’u vendosur sa i përket formacionit titullar. Trajneri Gvozdenoviç ka disa dilema taktike, sidomos në fazën sulmuese, ku konkurrenca është e fortë. Megjithatë, një gjë është e sigurt: Elbasani do të zbresë në fushë për të sulmuar dhe për të kërkuar fitoren, pavarësisht emrit të kundërshtarit.

BUNJAKU – Sulmuesi Fatjon Bunjaku, i afruar këtë merkato vere te Elbasani, ka shprehur entuziazmin e tij për ambientin dhe mikpritjen që ka gjetur në skuadrën verdheblu. Ai shihet si një përforcim i rëndësishëm për repartin ofensiv të ekipit. Në prononcimin e dhënë për mediat, Bunjaku është ndalur te pritja që ka marrë nga klubi, duke e cilësuar atë si të ngrohtë: “Pritja ka qenë shumë e mirë, si nga lojtarët, stafi dhe tifozeria.

Ndihem shumë mirë që jam pjesë e këtij klubi me një traditë shumë të madhe”, u shpreh fillimisht futbollisti nga Kosova. Ai ka vlerësuar gjithashtu edhe harmoninë që ekziston brenda skuadrës, e cila sipas tij reflektohet si në fushë, ashtu edhe jashtë saj. “Atmosfera është shumë e mirë brenda klubit, si në fushë edhe jashtë saj”, theksoi 21- vjeçari. Bunjaku ka folur edhe për fazën përgatitore dhe punën e bërë nga ekipi gjatë verës, duke nënvizuar vendosmërinë për të dhënë maksimumin në çdo ndeshje:

“Kemi punuar shumë si ekip edhe gjatë ndeshjeve miqësore, fazës përgatitore. Ne në çdo ndeshje do të presim gjithnjë maksimumin”, tha shkurtimisht sulmuesi i Elbasanit, i cili ndaj Flamurtarit bëri edhe debutimin me verdheblutë. Sulmuesi i ri i Elbasanit duket plot besim dhe optimizëm për sezonin që po vjen. Puna në stërvitje, afrimet cilësore dhe mbështetja e tifozëve po krijojnë një klimë pozitive, ku pritshmëritë janë të larta. Me kontributin e tij në repartin e avancuar, Bunjaku pritet të jetë një nga pikat e forta të skuadrës që drejtohet nga Ivan Gvozdenoviç.

VLADIMIR MEMA-PANORAMASPORT.AL

---