Elbasani do të paraqitet me një repart ofensiv thuajse tërësisht të transformuar në sezonin e ri. Drejtuesit verdheblu kanë vendosur të ndërhyjnë ndjeshëm në vijën e parë, duke afruar futbollistë me karakteristika të ndryshme dhe duke i dhënë trajnerit Ivan Gvozdenoviç më shumë alternativa përpara sfidave të kampionatit dhe Konferencë Ligë.

Pas një sezoni ku skuadra arriti të sigurojë pjesëmarrjen në kupat e Europës, në klub ekziston bindja se duhen më shumë zgjidhje në fazën sulmuese për të përballuar një kalendar më të ngarkuar. Pikërisht për këtë arsye, merkatoja e verës ka sjellë ndryshime të shumta në repartin që pritet të mbajë peshën kryesore të objektivave të skuadrës.

SULMI – Deri tani, Elbasani ka afruar Rubin Hebajn, Ardit Nikajn, Ledio Tresën dhe Edoli Lukokin, katër futbollistë që pritet të kenë rol të rëndësishëm në projektin e ri të verdhebluve. Hebaj vjen me statusin e një sulmuesi të konsoliduar në futbollin shqiptar dhe me eksperiencë të rëndësishme në Superiore. Ai pritet të jetë pika e referimit në qendër të sulmit dhe një nga armët kryesore përpara portës kundërshtare.

Nga ana tjetër, Nikaj dhe Tresa sjellin energji, shpejtësi dhe potencial, ndërsa Lukoki pritet të shtojë eksperiencë dhe cilësi në repartin ofensiv. Të katër së bashku formojnë një repart sulmues krejtësisht ndryshe nga ai i sezonit të kaluar.

ZGJIDHJET – Një nga aspektet që bie më shumë në sy është fakti se trajneri Gvozdenoviç do të ketë më shumë mundësi zgjedhjeje. Nëse sezonin e kaluar verdheblutë kishin një grup më të kufizuar në repartin ofensiv, tani situata duket ndryshe. Përveç konkurrencës së shtuar për një vend titullari, stafi teknik fiton mundësinë të ndryshojë skema dhe mënyra loje sipas kundërshtarit. Elbasani mund të luajë me një sulmues qendre klasik, por edhe me një repart më të lëvizshëm dhe dinamik, falë karakteristikave që sjellin afrimet e reja.

EUROPA – Ndryshimet në sulm lidhen ngushtë edhe me pjesëmarrjen në Konferencë Ligë. Përballë BATE Borisov dhe në vazhdim të sezonit, verdheblutë do të kenë nevojë për më shumë alternativa dhe për një repart ofensiv që të garantojë gola dhe efikasitet. Drejtuesit kanë investuar pikërisht në këtë drejtim, duke synuar që skuadra të mos varet nga një ose dy lojtarë, por të ketë disa zgjidhje në fazën sulmuese.

MERKATOJA – Pavarësisht afrimeve të deritanishme, puna në merkato nuk konsiderohet e mbyllur. Klubi vazhdon të monitorojë tregun për përforcime të tjera, ndërsa prioritet mbeten edhe disa reparte të tjera që kërkojnë ndërhyrje.

Ajo që duket e sigurt është se Elbasani i sezonit të ri do të ketë një identitet të ri në sulm. Emrat kanë ndryshuar, konkurrenca është shtuar dhe pritshmëritë janë më të larta se kurrë. Tashmë mbetet për t’u parë nëse ky repart ofensiv do të arrijë të justifikojë investimin dhe të udhëheqë verdheblutë drejt objektivave të mëdha që kanë vendosur për sezonin e ardhshëm.

V. MEMA – PANORAMASPORT.AL

---