Viti 2026 duket se ka zgjuar Vusal Isgandarli te Partizani. Sulmuesi ka gjetur një formë fizike shumë të kënaqshme, teksa pas Vitit të Ri, azerbaxhanasi ka gjetur rrugën e rrjetës në dy raste. Në fitoren 2-0 në derbin ndaj Tiranës, si dhe në barazimin 2-2 ndaj Elbasanit në kampionat.

Falë këtyre dy golave, Isgandarli është barazuar me Rrok Tomën në shifrën e pesë golave në kampionat për Partizanin (golashënuesit më të mirë të skuadrës në kampionat), teksa nga një më pak se dyshja e sipërpërmendur kanë shënuar Kontreras e Sidibe, ndërsa në kuotën e tre golave është Xhuliano Skuka.

Megjithatë, më shumë se sa golat, sulmuesi azer po spikat me kontributin e tij në krahun e majtë, teksa e ndihmon skuadrën në fazën mbrojtëse dhe sulmuese, dhe, siç u theksua më lart, po kalon një formë mjaft të mirë fizike. 30- vjeçari, falë sakrificës në fushë, në ndeshjet e fundit ka marrë edhe mbështetjen e tifozërisë së kuqe, që nuk i kanë kursyer duartrokitjet në drejtimin e tij. Edhe trajneri Oltijon Kërnaja i ka dhënë mjaftueshëm besim Isgandarlit, që është një titullar i padiskutueshëm për kryeqytetasit.

PANORAMASPORT.AL

---