Tirana është futur edhe një herë tjetër në merkato. Këtë herë qëllimi është që të afrojë një mbrojtës të djathtë.

Drejtuesit e klubit kanë marrë vendimin urgjent, duke vlerësuar situatën që po kalon skuadra. Në fakt, shtysën më të madhe për këtë vendim e ka dhënë dëmtimi i Rimal Haxhiut. Futbollisti u lëndua në sfidën e Kupës me Bylisin dhe rrezikon të jetë jashtë, gjatë. Ndonëse ende nuk kanë dalë rezultatet e rezonancës magnetike, duket se futbollisti mund të jetë jashtë nga 1 deri në tre muaj. Për Tiranën, kjo do të ishte humbje e madhe, pasi praktikisht, skuadra nuk ka mbrojtës të djathtë, ndonëse edhe Haxhiu ishte sajuar në këtë pozicion.

Alternativa e vetme që ka tani Magani është Gjumsi, i cili është anësor, por bën edhe rolin e mbrojtësit të djathtë nga halli, në ndihmë të skuadrës. Bardheblutë do të shohin në tregun e huaj për të gjetur mbrojtës të djathtë. Kujtojmë që Tirana e pati mbrojtësin e djathtë, Aran Isuf, i cili erdhi në verë nga kampionati bullgar. Gjithsesi, Isuf vendosi të largohej në dhjetor, duke prishur me mirëkuptim kontratën me ekipin e Tiranës.

OLSI AVDIAJ-PANORAMASPORT.AL

---