Partizani ka zbritur në fushë dhe ka nisur përgatitjet për ndeshjen e së premtes kundër Bylisit në orën 18:00 në stadiumin “Arena e Demave”. Të kuqtë do të kërkojnë të kthehen te fitorja pas katër ndeshjeve radhazi pa ia dalë.

Bylisi nuk po përjeton ditët më të mira dhe mund të themi se ballshiotët janë një mundësi e mirë që Partizani të kthehet të bëjë ekipin pretendent për titullin. Sa i përket organikës, të kuqtë kanë disa lajme të mira.

Për këtë ndeshje pritet të kthehen tre lojtarë nga pezullimet: Janjeva dhe Taipi kanë shlyer kartonët e marrë në derbi, teksa për Bytyçin ka mbetur gjysma e dënimit dhe klubi pritet ta shlyejë me gjobë sfidën e mbetur.

Sakaq, vijon pezullimi për Gudjufin. Sa i përket aspektit fizik, mund të themi se Kote është tërësisht i gatshëm për lojë, teksa priten edhe rikthimet e Prekës dhe Shanajt, që kanë pasur probleme shëndetësore për shkak të virozave. I dëmtuar momentalisht vijon të jetë vetëm Eleke, i cili ka nisur vrapimet dhe është në fazën e fundit të rikuperimit. Rikthimet e shumta pritet të pasohen edhe nga ndryshime në 11-shen e Veselinoviç.

PANORAMASPORT.AL

---